Almatynyń bas sanitar dárigeri Jandarbek Bekshin jańa qaýlyǵa qol qoidy, dep habarlaidy "Ult aqparat".
Qujatqa sáikes, dárihanalar Ashyq qosymshasyna qatyspaidy.
Sondai-aq 2021-2022 oqý jylynda barlyq bilim berý uiymdaryna shtattyq formatta oqýǵa ruqsat berildi.
Aýdan ákimderi, Almaty qalasy bilim basqarmasy, joǵary oqý oryndary, jekemenshik mektepter men balabaqsha basshylary pedagogter men personaldyń 100% koronavirýsqa qarsy vaktsina saldyrýyn qamtamasyz etýi kerek. Bul tizimge meditsinalyq qarsy kórsetilimi bar naýqastar men keiingi 3 aida aýyrǵan azamattar kirmeidi.
Mekemege kireberiste pedagogter men qyzmetkerler, ata-analar, 18 jastan asqan bilim alýshylar Ashyq qosymshasy arqyly tirkeledi.
Sondai-aq qalada 18 jastan asqan stýdentterdiń arasynda Covid-19 infektsiiasyna qarsy vaktsina saldyrǵandar jataqhanaǵa ornalastyrylady.
Al sheteldik stýdentter turǵylyqty eldiń ýákiletti organy rastaǵan Covid-19 infektsiiasyna qarsy vaktsinany tolyq saldyrǵanyn rastaityn qujatyn kórsetip, Qazaqstan memlekettik shekarasynan ótkennen keiin 3 táýlikten keshiktirmei PTR ádisi arqyly koronavirýstyń joq ekenin kórsetken jaǵdaida kúndizgi oqý formatyna jiberiledi.
Qaýlyǵa sáikes, mektepke deiingi jáne orta bilim berý uiymdaryna, kolledj, joǵary oqý oryndaryna respiratorlyq infektsiia belgileri bar adamdarǵa (jótel, murynnyń bitelýi, temperatýrasy 37 gradýstan joǵary), QR-kod boiynsha tirkeý kezinde "sary" jáne "qyzyl" statýsy bar adamdarǵa, Covid-19 infektsiiasyna qarsy vaktsina saldyrmaǵan pedagogter men personalǵa kirýge ruqsat berilmeidi.
Aita keteri, "sary" jáne "qyzyl" statýs Covid-19 tabylǵan adam men Covid-19 anyqtalǵan adammen bailanysta bolǵan kezde shyǵady.
Qaýly búginnen bastap kúshine endi. Qujattyń tolyq mátinin myna jerden oqýǵa bolady.
