Maýsymdyq tumaý aldynda oǵan qarsy ekpe alý kerek pe jáne ol koronavirýsqa qalai áser etedi degen suraqtarǵa Almaty qalasynyń memlekettik bas sanitar dárigeri Jandarbek Bekshin jaýap berdi, dep habarlaidy "Ult aqparat".
«JRVI men tumaýǵa koronavirýs infektsiiasy qosylsa, jaǵdai óte qiyn bolady. Biz jedel zerthanalyq keshendi taldaý jasaý suraqtaryn qarastyryp jatyrmyz. Qazir jańa tehnologiialar paida boldy. Olardy der kezinde engizý úshin ýaqytymyz bar. JRVI men tumaýmen aýyrǵandar sanyn azaitý úshin, tumaýǵa qarsy vaktsinatsiia jasaý kerek», - dedi Bekshin.
Ol koronavirýs infektsiiasy tárizdi jedel respiratorlyq jáne virýstyq infektsiia kezinde de adamdardyń kóz jumý jaǵdailarynyń bolatyndyǵyn eskertti.
«Sol sebepti bizge júieli jumys júrgizý kerek. Biz bul máselelerdi talqylap, koronavirýspen qatar, JRVI men tumaýdyń aldyn alý sharalaryn qarastyryp jatyrmyz. Birinshi bólikti joiý úshin vaktsinatsiia jasaý kerek. Eger birinshi adam tumaýmen aýyryp, oǵan keiin koronavirýs qosylsa, immýnitet kótere almaidy. Sol sebepti biz jaqsy vaktsinatsiia jasaýǵa daiyndalýymyz kerek. Eger koronavirýs infektsiiasy tumaýdyń ústine qosylsa, kez kelgen aǵzanyń eki soqqyǵa shydaýy qiyn bolady», - dep túsindirdi Jandarbek Bekshin.
