Almatyda ótken onlain brifing barysynda Almaty bas sanitarlyq dárigeri Jandarbek Bekshin nelikten kinoteatrlardyń jumysyna ruqsat berilgenin túsindirdi, dep habarlaidy QazAqparat.
Onyń aitýynsha, qazir kinoteatrlar men saýda oiyn saýyq ortalyǵynyń senbi kúnderi ashylýyna qatysty talqylaý júrip jatyr.
«Bul tek jasyl aimaqtaǵy óńirlerge ǵana qatysty. Eger, aýrý kórsetkishteri ósip bara jatsa, kinoteatrlardyń ashylýy týraly másele qarastyrylmaidy. Kinoteatr basshylary ujymdyq retserkýliatsiia, bakteritsidti shamdar ornata bastady. Zalǵa 30 paiyzdan artyq adam kirgizbeý, adamdardy qashyqtan otyrǵyzý siiaqty usynystar aityp jatyr. Al saýda-oiyn saýyq ortalyqtarynda kóńil kóterý oryndary burynǵydai jabyq bolady. Biznes ókilderi osy ýaqytqa deiin jai qarap otyrǵan joq. Ujymdyq diagnostikanyń túrli sharalaryn qabyldady. Qazir saýda oiyn saýyq ortalyǵynda kelýshilerdiń sanyn esepteýge múmkindik týdy. Eger kelýshiler sany 30 paiyzdan asyp ketse, ortalyq basshylyǵy birden nysandy jabýy tiis. Biznes ókilderi ortalyqta retserkýliatsiia, aýany zararsyzdandyrý siiaqty túrli sharalardy qolǵa alyp jatyr. Bul jerde negizgi maqsat basqa nysandarǵa júktemeni azaitý. Eki kún qatarynan aýrý kórsetkishiniń shekti ósim deńgeiinen asyp jatqan joq. Eger odan asyp ketse, karantindi jeńildetý sharalary múlde qarastyrylmaidy», - dedi Bekshin.
Onyń aitýynsha, bul másele birden qabyldanbaidy.
«QR Bas sanitarlyq dárigeriniń qaýlysynan soń bul másele qoǵamdyq uiymdar, biznes, qala biliginiń qatysýymen qalalyq shtabta qaralady. Ol nysandar jumys istep tur. Tek senbi kúnderi keshki 17:00 deiin jumys isteýi qarastyrylady», - dedi dáriger.
Aita ketý kerek, Almatyda epidemiologiialyq ahýal turaqty dese de bolady. Táýliktik ósim kólemi 0,5 paiyz bolyp otyr. Ótken táýlikte qalada 12 adam virýs juqtyrǵany anyqtaldy. Onyń ishinde 10 adam jergilikti bolsa, 2 adam virýsty Egipetten juqtyryp kelgen.
