Almaty qalasynyń bas sanitarlyq dárigeri Jandarbek Bekshin onlain brifing barysynda qaladaǵy epidemiologiialyq jaǵdai týraly aitty, dep habarlaidy QazAqparat.
«Almatyda jyl basynan beri koronavirýs infektsiiasynyń 17 790 jaǵdaiy tirkeldi. Tamyz aiynan bastap esepke alynǵan pnevmoniianyń 1 349 jaǵdaiy tirkeldi. Qyrkúiek aiynda virýstyń taralýy 165 jaǵdaidan tómendegen edi, al qazir 1 660 jaǵdaiǵa deiin tirkelip, indettiń taralýy ósip otyr», - dedi ol.
Onyń aitýynsha, Almaty qalasynda epidemiologiialyq jaǵdaidyń órbýi aldyn ala boljamdaǵan mólsherge sáikes kelip otyr. Máselen jeltoqsan aiynda 1 aptada – 420 jaǵdai, 2 aptada – 460 jaǵdai, 3 aptada – 510 jaǵdai, 4 aptada - 560 jaǵdai, boljam boiynsha jalpy aidyń qorytyndysymen 1900 jaǵdai jáne pessimistik boljam boiynsha 2200 jaǵdaiǵa jetýi múmkin.
«Almaty qalasynda, bizdiń elde jáne álemde koronavirýs infektsiiasynyń epidemiologiialyq jaǵdaidyń kúrdelene túskenin eskere otyryp, qoǵam, biznes, Atameken ulttyq kásipkerler palatasy, prokýratýra jáne qalalyq ákimdik ókilderimen jan-jaqty talqylap, 23.12.2020 jylǵy №66 qaýlysyn qabyldadyq», - dedi Jandarbek Bekshin.
Sonymen qatar, ol Almaty qalasynyń bes myń turǵynyna júrgizgen zertteý koronavirýstyq infektsiiaǵa qarsy ujymdyq immýnitettiń qalada 55-56% deńgeiinde qalyptasqanyn atap ótti.
«Zertteýdi sanitariialyq-epidemiologiialyq saraptama jáne monitoring ǵylymi-praktikalyq ortalyǵy júrgizýde. Kezdeisoq irikteý arqyly 5 myń adam tekserildi, onyń nátijesi boiynsha ujymdyq immýnitet 55-56% deńgeiinde degen qorytyndy jasaldy. Alaida, bul tolyq jáne dál qorytyndy shyǵarý úshin jetkiliksiz. Jumys jalǵasýda», - dedi ol.
Onlain brifing barysynda Almatynyń bas sanitarlyq dárigeri ásirese jastarǵa eskertý jasap, karantin talaptaryn muqiiat qadaǵalaý qajettigin eskertti. Sondai-aq ol sóz arasynda, qalada esikti ishten jaýyp, jumys isteitin klýbtarmen jańa tásilmen kúrestinderin jetkizdi.
Sonymen qatar, ol mektepterdegi kezekshi synyptar jabylmaitynyn atap ótti.
«Eger bir muǵalim aýyryp qalsa, synypta otyrǵan 30-40 oqýshy da aýyrady. Eger odan ári kóbeietin bolsaq, muǵalim oqýshylardan basqa muǵalimdermen de bailanysady. Bul mektep boiynsha infektsiianyń qarqyndy taralýyna yqpal etedi. Balabaqshada da solai. Sondyqtan kezekshi synyptar barlyq talaptarǵa sáikes bolýy kerek. Sanitarlyq–epidemiologiialyq talaptardy saqtai otyryp mektepterdegi kezekshi synyptar men balabaqshalardaǵy kezekshi toptardyń jumysy jalǵasady», - dedi Jandarbek Bekshin.
Qalanyń bas sanitarlyq dárigeriniń aitýynsha, bul balalar arasynda aýrýdyń kúrt ósýine jol bermeidi.
Onlain brifing barysynda BAQ ókilderi vaktsinaǵa qatysty biraz saýal qoidy.
Óz kezeginde, Almatynyń bas sanitarlyq dárigeri Jandarbek Bekshin infektsiiadan keiin aǵzasynda antidene tabylmasa, Qazaqstanda tirkelgen vaktsinany saldyratynyn jetkizdi.
«Eger antidene saqtalsa, vaktsina saldyrýdyń qajeti joq. Eger joq bolsa, qoljetimdi vaktsinany saldyramyn. Bul ne reseilik, ne otandyq bolady», dedi Bekshin.
Aitýynsha, qazir Taraz ben Almatyda otandyq vaktsinanyń klinikalyq synaǵynyń úshinshi kezeńi júrip jatyr.
«3 myń eriktige vaktsina egiledi, sodan keiin sol vaktsinany egemiz be, joq pa, naqty sheshiledi. Al qazirge deiin vaktsinanyń qaýipsizdigin tekserý synaǵynyń kezeńderi sátti ótti. Aldyn ala aqparat boiynsha bizdiń vaktsina 96% tiimdilikti kórsetti. Bul óte jaqsy kórsetkish», – dedi ol.
