Qazaq ulttyq sport túrleri qaýymdastyǵynyń jańa prezidenti bolyp belgili kásipker jáne metsenat, Altyn Qyran Foundation qoǵamdyq qory qamqorshylyq keńesiniń tóraǵasy Islambek Saljanov sailandy. Bul týraly Qaýymdastyq quryltaishylarynyń onlain jáne oflain formatta ótken jinalysy barysynda belgili boldy, dep habarlaidy "Ult aqparat" Mádeniet jáne sport ministrliginiń baspasóz qyzmetine silteme jasap.
Aita keteiik, Qazaq ulttyq sport túrleri qaýymdastyǵy kókpar, aýdaryspaq, báige, jamby atý, teńge ilý, toǵyzqumalaq jáne t.b. sport túrlerin biriktiredi. Buǵan deiin uiymdy Bekbolat Tileýhan basqarǵan bolatyn.
«Táýelsizdik jyldarynda ulttyq sport túrlerin nasihattaý jáne damytý baǵytynda aitarlyqtai jumys atqaryldy. Jarystar respýblikalyq jáne halyqaralyq deńgeide ótkizildi, qajetti infraqurylym paida boldy. Búginde Qaýymdastyq aldynda jańa mindetter tur, olarǵa qol jetkizý úshin barlyq taraptardyń kúsh-jigerin biriktirý qajet», – dedi jiyn barysynda Mádeniet jáne sport ministri Dáýren Abaev.
Óz kezeginde Islambek Saljanov jiynǵa qatysýshylarǵa senim bildirgeni úshin alǵys aitty.
«Bizdiń Qaýymdastyq balalar sportyna erekshe nazar aýdarýy qajet. Buǵan qosa, ulttyq sport standarttaryn bekitip, jańa formattardy engizýdi josparlap otyrmyz. Máselen, ulttyq at sportyn jańǵyrtý óte mańyzdy», – dedi Islambek Saljanov.
Qatysýshylar Qaýymdastyqtyń burynǵy basshylyǵy atqarǵan jumystardy jáne ulttyq sport túrlerin damytýǵa qosqan úlesin erekshe atap ótti.
Sondai-aq quryltaishylardyń jalpy jinalysy barysynda Ulttyq sport qaýymdastyǵynyń 2019-2022 jyldary atqarǵan qyzmeti týraly esep tyńdalyp, birlestiktiń jańa basshylyq quramy sailandy.
