Májilis depýtaty Bekbolat Tileýhan Nursultan Nazarbaevtyń prezidenttik ókilettigin toqtatý týraly sheshimin estigende qandai sezimde bolǵanyn aitty, dep habarlaidy Sputnik Qazaqstan tilshisi.
Depýtat bul jańalyqty teledidardan estigen.
"Kózime jas aldym. Bul kúnniń bolatynyn biletin edik, biraq mundai jedeldikti kútken joqpyn. Taǵy da óziniń saiasi danalyǵyn kórsetti. 30 jyl el basqarǵan kezde aldyn eshkimge boljatpai, qandai qadam jasaitynyn eshkimge bildirtpei kelgen osy bir keremet sheber qalpynda kelip, sheber qalpynda taǵyn usyndy ǵoi", - dedi Tileýhan parlament palatalarynyń birlesken otyrysynda.
Májilismen qimastyq sezimi basymyraq ekenin ashyq aitty.
"Táýelsiz el bolǵanda 25-tegi jas jigit edik, qazir 53-ke bet alǵan jigit aǵasy bolyp qaldyq. Osy kezeń qazaqtyń aýzynan aq mai aqqan eń bir baqytty kezeńiniń qalaýshysy, óz qolymen táýelsizdiktiń kirpishin qalaǵan Uly adamnyń óz taǵyn ysyryp berýi, sol eldiń biigine qyran siiaqty ushyp kelip, sol taqtan odan da joǵary, qyran siiaqty shyńǵa qarai bettegen tulǵa úshin maqtanysh sezimi de bar, biraq qimastyq sezimi basymyraq bolyp otyr", - dep aǵynan jaryldy depýtat.
Ol prezident sailaýy bolǵanda, Qazaqstandy kim basqaratynyn halyqtyń ózi sheshetinin atap ótti.
Sondaiq-aq, Bekbolat Qanaiuly Astananyń ataýyn Nursultan dep ózgertý tarihi jáne ádil sheshim dep sanaitynyn aitty.
"Men ózimdi qashannan beri Nursultan qalasynyń turǵyny retinde sezinip júrgenmin. Jalpy bul tarihi jáne óte ádil sheshim. Biz zańǵa baǵynǵan saiasattyń adamymyz. Árine, zań boiynsha, ishki erejemiz boiynsha júrýdi mindet dep esepteimin", - dedi Tileýhan parlament palatalarynyń birlesken otyrysynan keiin.
Depýtat Toqaevtyń jasaǵan barlyq usynysy aqylǵa qonymdy ekenin atap ótti.
"Elbasy qandai qurmet jasasaq ta, oǵan laiyq dep bilemin. Elbasynyń baǵytyn qashannan beri qoldaǵan áriptes retinde, qazaq balasy retinde muny qoldaimyn", - dedi ol.
Tileýhan eldiń jańa basshysy Qasym-Jomart Toqaev Qazaqstan halqyna bergen antyna berik bolatynyna kúmán keltirmeitinin aitty.
"Ol Nursultan salǵan joldan taimai, álem aldynda Qazaqstannyń bedelin túsirmei, osy baǵyt-baǵdardy ári qarai strategiialyq túrde alyp júretinin aityp, ant berdi. Sóz joq senemin, bul kisiniń tulǵasyn aiqyndaǵan, táýelsiz Qazaqstannyń qalyptasýynda óziniń airyqsha róli bar saiasi tulǵa ekeni bárimizge aian. Sondyqtan antyna, ýádesine berik bolatynyna kúmánim joq", - dedi Tileýhan.
