Májilis depýtaty Bekbolat Tileýhan balabaqshaǵa ekpe almaǵan balalardy qabyldamaýdy zańmen bekitýge qarsy shyqty, dep habarlaidy Sputnik Qazaqstan.
Búgin májiliste "Halyq densaýlyǵy jáne densaýlyq saqtaý júiesi týraly" kodeks jobasy birinshi oqylymda qaraldy. Atalǵan qujatta balalarǵa keibir aýrýlarǵa qarsy ekpe saldyrý mindetti dep kórsetilgen. Ekpe salynbaǵan balalardy balabaqshadaǵy ujymdyq immýnitettiń joǵary deńgeii saqtalǵan jaǵdaida ǵana alýǵa ruqsat beriledi.
Májilis depýtaty Bekbolat Tileýhan qoǵamda daý týǵyzǵan bappen kelispeitinin jasyrmady.
"Men sailaýshylarymnyń amanatyn jetkize otyryp, osy 89-bapqa qarsy shyǵatynymdy jetkizgim keledi. Jumsaq kúsh, ilandyra túsindirý ádisimen kóndirýdiń ornyna bas kóz joq "mindetti" dep zańǵa qondyryp, tizege salýdyń qandai reti bar? Úkimet kúshine senbei me, álde erine me?", - dedi ol.
Depýtat jalpy vaktsinaǵa qarsy emes ekenin, balalaryna saldyratynyn aitty. Biraq munyń nege zańmen mindettelip otyrǵany Tileýhanǵa túsiniksiz.
"Bas prokýratýradan suraitynym, bas tartqan adam is júzinde zań buzýshy bolyp shyǵa kele me? Konstitýtsiianyń 29-babyna qaishy kelmei me? Ár adam óziniń densaýlyǵyn qorǵaýǵa quqyǵy bar. Maǵan túsindirińizdershi, maǵan túsindire almasańyzdar, qoǵamǵa túsindirýge óte qiyn bolady. Nege biz mindetteýimiz kerek?", - dedi májilismen.
Bas prokýrordyń orynbasary Marat Ahmetjanov munyń Ata zańǵa qaishy emes ekenin málimdedi.
"Eger adamnyń ómirine, densaýlyǵyna qaýip bolsa, basqa zańmen onyń quqyǵyn, iaǵni, bilim alý, eńbek etý quqyǵyn shekteýge múmkindik bar. Sebebi bizde adamnyń ómiri men densaýlyǵy eń qundy dep esepteledi. Sondyqtan Konstitýtsiiaǵa qaishy emes", - dep jaýap berdi ol.
Al densaýlyq saqtaý ministri Eljan Birtanovtyń aitýynsha, mindetti vaktsinatsiiany engizýdegi maqsat – infektsiialyq aýrýlardan basqa azamattardyń densaýlyǵyn qorǵaý.
"Sebebi qazirgi kúnde ata-analardyń ekpeden bas tartýynyń saldarynan elimizde burynnan umytylǵan infektsiialyq aýrýlar qaityp kelip jatyr. Biraq odan tek qana sol balalar emes, basqa da kóptegen meditsinalyq aýrýmen aýyratyn balalar aýyryp ólýde. Biraz memlekette keibir vaktsinalardy salý zańmen mindettelgen. Bizdiń de kózdegenimiz osy", - dedi ol.
Májilis depýtattary zań jobasyn birinshi oqylymda maquldady.
