Almaty oblysynyń Talǵar aýdandyq sotynda áýejai mańynan zańsyz jer bergen eks-sheneýnikterge qatysty sot aiaqtalýǵa jaqyn. Sottaǵy sońǵy sózin sóilegen eks-sheneýnikter bas bostandyǵynan aiyrmaýdy surady, dep habarlaidy "Ult aqparat".
Búgin sońǵy sózin sóilegen eks-sheneýnikter óz kinásin tolyq moiyndady jáne qatty ókinetinin jetkizdi.
Olar ózderin basbostandyǵynan aiyrmaýdy surady. Sebebi, olardyń 3-4-ten kámelet jasyna tolmaǵan balalary bar.
Jáne basym bóligi - úidiń jalǵyz asyrýshylary. Sonymen qatar, olardyń ata-anasy - egde jastaǵy adamdar.
Tek rieltor Nuraiym Aldanysh qana óz kinásin moiyndamady. Ol óziniń kinási qujatpen dáleldenbegenin aitty.
Onyń qorǵaýshysy Azamat Bakenov N. Aldanyshtyń bul iske qatysy joq ekenin jetkizdi.
Rieltordyń kámelet jasyna tolmaǵan 3 balasy bar. Qorǵaýshynyń sózinshe, rieltor jer satýmen ǵana ainalysqan.
Al rásimdeý jumysymen ainalyspaǵan. Sondyqtan onyń kinási joq ekenin qorǵaýshysy alǵa tartty.
«Rieltor jerdi satyp ber degen adamdardyń jarnamasy boiynsha jumys istedi. Al sol jerdiń ieleri bul iste joq. Nuraiym Aldanyshtiń bul iste kinási joq», - dedi qorǵaýshysy.
Aita keteiik, buǵan deiingi protseste prokýror eks-sheneýnikterdi, iaǵni, barlyq sottalýshylardy 4 jyldan 6 jylǵa bas bostandyǵynan aiyrý jazasyn suraǵan bolatyn. Qazir osy is boiynsha alty adam sottalyp jatyr. Onyń beseýi - eks-sheneýnik.
Olar - Rýstam Turysbekov, Jaras Mashimbaev, Berik Abdýllaev, Medeý Qalybekov, Qairat Altynbekuly jáne rieltor Nuraiym Aldanysh.
Rieltor qamaýda otyr. Al burynǵy sheneýnikter úiqamaqta.
Prokýror Rýstam Turysbekovke - 6 jyl qaýipsizdik deńgeii tómen túzeý mekemesinde jazasyn óteýge jáne 7 jyl memlekettik qyzmette jumys isteý quqyǵynan aiyrýdy, Jaras Mashimbaevty - 4 jylǵa bas bostandyǵynan jáne ony da 7 jylǵa memlekettik qyzmette jumys isteý quqyǵynan aiyrýdy surady.
Sondai-aq Qairat Altynbekulyn 5 jylǵa bas bostandyǵynan aiyrýdy jáne 6 jyl memlekettik qyzmette isteýge tyiym salýdy, Medeý Qalybekov - 4 jyl, Berik Abdýllaevqa - 4,5 jyl, al rieltor Nuraiym Aldanyshty 5 jylǵa bas bostandyǵynan aýyrý jazasy suraldy.
Prokýrordyń sózinshe, zańsyz úi salý boiynsha sottalýshylardyń kinási qujatpen dáleldengen jáne kýágerlerdiń de dáleli bar.
Sondai-aq memlekettik aiyptaýshy barlyq úiqamaqta otyrǵan burynǵy sheneýnikterdi sot zalynda qamaýǵa alýdy surady.
Esterińizge sala keteiik, 2019 jyldyń 27 jeltoqsanyńda «Bek Air» áýe kompaniiasynyń ushaǵy apatqa ushyrady.
Almaty - Nur-Sultan baǵytyndaǵy ushaq biiktikti saqtai almai, beton qorshaýyn buzyp ótken.
Artynsha eki qabatty turǵyn úige soǵyldy, 12 adam mert boldy, 69 adam zardap shekti. Onyń 51-i aýrýhanaǵa tústi.
