2019 jylǵy jeltoqsanda bolǵan «Bek Air» ushaǵynyń apatynan zardap shekken jolaýshylar men qaza tapqandardyń týystary alty jyl ótken soń ótemaqy óndirip alý úshin sotqa júgine bastady, dep habarlaidy ult.kz. Bul týraly Kozachkov offside telegram arnasynan belgili boldy.
2019 jylǵy 27 jeltoqsanda Almaty áýejaiynda «Bek Air» áýe kompaniiasynyń «Fokker-100» ushaǵy apatqa ushyraǵan. Astanaǵa baǵyt alǵan reiste 98 adam, onyń ishinde 5 ekipaj múshesi bolǵan.
Ushaq áýege kóterilgen kezde basqarýdan aiyrylyp, ushý-qoný jolaǵynan shyǵyp ketken. Keiin zańsyz salynǵan úige soǵylǵan. Apat saldarynan 12 adam qaza tapty.
Arada alty jyl ótken soń, 2025 jylǵy qarashada, apatqa ushaq ekipajynyń komandiri Marat Muratbaev pen ekinshi ushqysh Mirjan Moldaqulov kináli dep tanyldy. Ekeýi de qaitys bolǵandyqtan, sot isi syrttai júrgizildi.
Sot zardap shekkenderdiń azamattyq talap qoiý arqyly ótemaqy óndirip alý quqyǵyn da moiyndaǵan.
Osydan keiin jábirlenýshiler men qaza bolǵandardyń týystary sotqa júgine bastaǵan.
Alǵashqylardyń biri bolyp balabaqsha tárbieshisi Amina Ospanovanyń uly Fazyl Ospan talap aryz bergen. Amina Ospanova memlekettik nagrada alý úshin Astanaǵa ushyp bara jatqan. Alaida bul reis onyń ómirindegi sońǵy sapar boldy.
Sot apatqa kináli dep tanylǵan ushqyshtardyń «Bek Air» kompaniiasynda jumys istegenin eskerip, áýe kompaniiasynyń da jaýapkershiligi bar degen qorytyndyǵa kelgen. Nátijesinde sot «Bek Air»-den 5 mln teńge óndirip alý týraly sheshim shyǵardy. Qaýly zańdy kúshine engen.
Sondai-aq sol reistiń jolaýshysy Janat Ábilev moraldyq ziian úshin 10 mln teńge jáne bilet qunyn qaitarýdy talap etken. Er adam apattan dene jaraqatyn almaǵanymen, psihologiialyq zardap shekkenin aitqan. Sot onyń moraldyq ziianyn 1 mln teńge dep baǵalaǵan.
Al osy aýdandyq sotta taǵy bir is qaralyp jatyr. 33 jastaǵy Shyńǵystóre Jumahanov apattan keiin múgedek bolyp qalǵanyn aityp, shamamen 90 mln teńge ótemaqy talap etip otyr.
Sonymen qatar quqyq qorǵaý organdary «Bek Air» iesi Nurlan Jumasultanovtyń jáne kompaniiada basshylyq qyzmet atqarǵan otbasy músheleriniń áreketinen qylmys belgilerin anyqtamaǵan.
