Dúisenbi, 20 qańtar kúni «Bek Air» áýe kompaniiasynyń aldaǵy taǵdyryna qatysty túpkilikti sheshim qabyldanady. Bul jaiynda «Habar-24» telearnasynyń «Raqym Oshaqbaevpen dóńgelek ústel» baǵdarlamasyna suhbat bergen «Qazaqstannyń aviatsiialyq ákimshiligi» AQ bas direktory Piter Griffits aitty, dep habarlaidy QazAqparat.
«Komissiiamen sóilestim jáne kelesi dúisenbide Bek Air bolashaǵyna qatysty túpkilikti kesimdi kútýge bolady. Atalǵan áýe kompaniiasynyń sertifikaty (IOSA sertifikaty) bolmasa da ushaqtardy paidalana berýin jalǵastyrýy bul kompaniiada birdeńeniń durys bolmaǵandyǵyn dáleldeidi. Sondyqtan da áýe kompaniiasynyń qalai jumys istegendigine qatysty tergeýdi bastaý týraly sheshim qabyldadym. Qysqa ǵana ýaqyttyń ishinde 2 tosyn oqiǵa boldy jáne bul - alańdatarlyq jait. Biz bul áýe kompaniiasy aviatsiialyq qaýipsizdiktiń barlyq talaptaryn qalai saqtaǵanyn jáne munyń barlyǵyn qalai baqylaǵandyǵyn tekserýge tyrysamyz», - dedi Piter Griffits suhbat barysynda.
Aita keteiik, «Bek Air» Qazaqstannyń aviatsiialyq ákimshiligin paidalanýshy sertifikatyn qabyldanǵan sheshim týraly habardar etpei jáne sebebin kórsetpei toqtatty dep aiyptaǵan bolatyn. Osy aiyptaýǵa jaýap bergen Qazaqstannyń aviatsiialyq ákimshiligi paidalanýshy sertifikatynyń qoldanylýyn toqtata turýǵa «Fokker-100» ushaǵynyń apaty sebep bolǵanyn aitqan.
«Bul týraly 2019 jylǵy 27 jeltoqsanda «Bek Air» AQ atyna jiberilgen RD270510 radiogrammasynda tikelei kórsetilgen. Mundai sheshim «Qazaqstan Respýblikasynyń áýe keńistigin paidalaný jáne aviatsiia qyzmeti týraly» Zańǵa sáikes qabyldandy. Onda sertifikattyń qoldanylýy ushý qaýipsizdigine tikelei qater tóndiretin zańnama talaptarynyń eleýli buzylýy anyqtalǵan kezde shekteletini kórsetilgen. Sondai-aq bul shara joǵaryda kórsetilgen qaǵidalardyń talaptaryn negizge alady. Oǵan sáikes ýákiletti uiym paidalanýshy sertifikattyq talaptar men shekteýlerdi saqtamaǵan jaǵdaida paidalanýshy sertifikatynyń qoldanylýyn toqtata turady» delingen taratylǵan aqparatta.
