QR Indýstriia jáne infraqurylymdyq damý ministrliginiń Azamattyq aviatsiia komiteti «Bek Air» kompaniiasyna júrgizilgen jospardan tys tekserý qorytyndysyn jariialady, dep habarlaidy "Ult aqparat".
Komitet aqparatyna sáikes, kompaniiada áýe saparyn jáne ushýǵa jaramdylyqty uiymdastyrý, muzdaýǵa qarsy óńdeý protsedýralary, ushý qaýipsizdigin basqarý júiesiniń standarttaryna sáikestigi, sondai-aq aviatsiialyq qaýipsizdik normalaryn saqtaý tártibi tekserilgen.
«2020 jyldyń 20 qańtarynda Qazaqstannyń aviatsiialyq ákimshiligi tekserýdiń aralyq nátijeleri men sol kezde anyqtalǵan buzýshylyqtar týraly habarlaǵan bolatyn. Aviatsiialyq qozǵaltqyshtardy paidalanýda óreskel buzýshylyqtar týraly aityldy. Biraq olar qozǵaltqyshtyń shyǵý tegin, onda ornatylǵan agregattardyń jumys isteýin jáne aqaýlar týraly jazbalardy anyqtaýǵa múmkindik bermeidi. Sondai-aq fiýzeliajdyń jáne áýe kemeleriniń basqa da bólikteriniń zaqymdanýy boldy. Olarǵa tehnikalyq qyzmet kórsetý jáne jóndelýi týraly jalǵan qujattar rásimdelip kelgen», - dep habarlaidy komitetten.
Atap ótilgendei, áýe kompaniiasy injenerlik qyzmettiń jáne ushý ekipajynyń muzdaný faktisin anyqtaý úshin ushar aldynda ushaq qanattaryn fizikalyq (taktildik) tekserýdiń mindetti protsedýrasyn saqtaýyn qamtamasyz etpegen.
«Sol kezde-aq áýe kompaniiasynyń Ushý qaýipsizdigin basqarý júiesi zańnama talaptaryna sáikes kelmeitindigi anyq edi», - delingen aqparatta.
Jalpy, tekseris qorytyndysy boiynsha áýe kompaniiasynyń sertifikattarynyń qoldanysyn toqtatýǵa negiz bola alatyn basqa da kóptegen eleýli buzýshylyqtar men kemshilikter anyqtalǵan.
«Olardyń qatarynda aviatsiialyq oqiǵany jasyrý, áýe kemesiniń úlgisine ruqsat alý úshin ushqyshtardy daiarlaý týraly jalǵan sertifikattardy paidalaný, ushaqtarǵa tehnikalyq qyzmet kórsetýdi oryndaý týraly jalǵan qujattar jasaý sekildi kemshilikter bar. Áýe kompaniiasy 2019 jyldyń 25 jeltoqsanynda Fokker-100 UP-F1017 áýe kemesimen bolǵan aviatsiialyq apattyń naqty sebepterin atamady», - dep habarlady komitetten.
Málim etilgendei, áýe kemesiniń komandiri «Nur-Sultan» halyqaralyq áýejaiynan Shymkent baǵytynda ushyp shyqqannan keiin №1 gidrojúieniń isten shyǵýyn anyqtaǵan. Bul olqylyq gidravlikalyq suiyqtyqtyń tolyǵymen aǵyp ketýine bailanysty bolǵan. Artynsha bul, jalǵasqanatshanyń shyqpai qalýyna, shassidiń aldyńǵy tiregin, biiktik rýlin elerondardy, reversti jáne ushý kezindegi basqa da jabdyqtardy basqarý tetikteriniń isten shyǵýyna alyp kelgen. Kúrdeli jaǵdaiǵa qaramastan, áýe kemesiniń komandiri №2 avariialyq gidrojúieni qoldana otyryp ushýdy jalǵastyrǵan. Shymkent qalasynyń áýejaiyna qonǵannan keiin, áýe qozǵalysyn basqarý dispetcherine shassidiń aldyńǵy tiregin basqarý tetiginiń isten shyqqany týraly jalǵan aqparat bergen.
Budan bólek, á ýe kompaniiasy ushqyshtarǵa aviatsiialyq qaýipsizdik jáne qaýipti júkterdi tasymaldaý boiynsha qaita daiarlaý kýrsyn aiaqtaǵany týraly formaldy sertifikattar bergen. Tekserý barysynda anyqtalǵandai, sabaq ýaqytynda jáne synaqtan ótý kezinde pilottar eldiń basqa óńirlerinde ushý tapsyrmasynda bolǵan.
Sondai-aq aviakompaniianyń eki ushqyshy Fokker 70/100 úlgisindegi áýe kemesin basqarý úshin qaita daiarlaý sertifikattaryn qoldan jasaǵany belgili boldy.
«Latviianyń oqý ortalyǵynda olar praktikalyq emtihandy tapsyra almaǵan. Osyǵan bailanysty olarǵa atalǵan keme úlgisin basqarý quqyǵy berilmei, tek kýrsty tyńdaǵandary jóninde anyqtama tapsyrylǵan», - delingen tekseris qorytyndysynda.
Osylaisha, litsenziiaǵa ruqsat belgisin qoidyrý úshin olar ýákiletti organǵa kýrsty sátti aiaqtaǵany týraly jalǵan sertifikat usynǵan. Oqý ortalyǵy sertifikattardyń jalǵandyǵyn rastady.
Qazirgi ýaqytta aviatsiialyq personal kýáligin qaitaryp alý máselesi sheshilýde.
««Bek Air» AQ aviatsiialyq qozǵaltqyshtardy óndiretin zaýyt - « Rolls Royce»-tiń qoldaýy jónindegi kelisimshartqa otyrmaǵan. Sonymen qatar, injenerlik protsedýralar nusqaýlyǵyn buza otyryp, aviatsiialyq qozǵaltqyshtardyń paidalaný derekteri óndirýshi zaýytqa olardy óńdeý úshin jiberilmegen. Sondai-aq olardy ózdiginen «Bek Air» AQ-da óńdeý júrgizbegen. Osylaisha áýe kompaniiasy aviatsiialyq qozǵaltqyshtardyń jai-kúiine monitoring júrgizbegen. Sáikesinshe olardyń senimdiligi men ushý kezindegi qaýipter týraly aqparaty bolmaǵan. Áýe kompaniiasy ýákiletti organnyń bekitýinsiz injenerlerge ruqsat sanatyn óz betinshe berip kelgen. Sondai-aq tiisti ruqsaty joq injenerlerge áýe kemelerinde tehnikalyq jáne paidalaný jumystaryn júrgizýge ruqsat bergen», - dep habarlaidy komitetten.
Sondai-aq, Almaty áýejaiynda áýe kompaniiasynyń eki injeneri Fokker-100 UP-F1014 ushaǵyna tehnikalyq qyzmet kórsetý týraly qujatty jalǵan rásimdegeni anyqtalyp otyr. Osy jumystar oryndalatyn kúni bort Aýǵanstan aýmaǵynda áýe saparyn oryndaý ústinde bolǵan.
«Bek Air» AQ-nyń qyzmetin jospardan tys tekserý nátijeleri áýe kompaniiaǵa jiberildi. Áýe kompaniiasy 10 kún ishinde Qazaqstannyń aviatsiialyq ákimshiligine barlyq buzýshylyqtardy joiý boiynsha túzetý is-qimyldarynyń josparyn usynýy tiis. Eger buzýshylyqtar 6 ai ishinde joiylmasa, paidalanýshy sertifikaty men ushýǵa jaramdylyq sertifikattary keri qaitarylyp alynady», - dep eskertedi Azamattyq aviatsiia komiteti.
