«Bek Air» áýe kompaniiasy basshylyǵynyń buqaralyq aqparat quraldary aldyna shyǵýdan bas tartýy durys emes. Bul týraly QR Premer-Ministriniń orynbasary Roman Skliar aitty, dep habarlaidy QazAqparat.
«Menińshe, olardyń BAQ aldyna shyqpaýy durys emes. Olar qaza tapqan jolaýshylardń týystaryna qandai qoldaý sharalarynyń kórsetiletindigin, zardap shekkenderge qandai kómek beretindikterin túsindirýi qajet», - dedi ol Úkimet otyrysynan keiin BAQ ókilderine bergen suhbatynda.
Sonymen qatar, vitse-premer atalǵan áýe kompaniiasynyń reisterine satyp alynǵan biletterdiń qanshasy qaitarylǵandyǵyna qatysty derektermen bólisti.
«10 qańtarǵa deiingi aralyqqa áýe kompaniiasy shamamen 19 myń bilet satqan. Qazirdiń ózinde 9 myńǵa jýyq bilet qaita tapsyryldy nemese ózge áýe kompaniialarynyń reisterine qaita brondaldy. Osynaý qiyn jaǵdaida qajetti kómek kórsetýge sheshim qabyldaǵan Kazakh Air, Scat, Air Astana áýe kompaniialaryna rizashylyǵymyzdy bildirgim keledi. Sonymen qatar, Qazaqstan temir joly basshylyǵyna osyndai jaǵdaida jolaýshylarǵa barynsha kómek kórsetý úshin qosymsha poiyz uiymdastyrǵanyna alǵys aitamyn», - dedi R.Skliar.
