Kievten sheginip, soǵysta edáýir shyǵynǵa ushyraǵanyn moiyndaǵan Resei Ýkrainadaǵy operatsiiaǵa jetekshilik etken qolbasshyny aýystyrdy. Bul jóninde aty-jónin aitpaǵan Batys elderiniń ókiline súiengen britandyq BBC agenttigi habarlady, dep jazady Azattyq.
Agenttik derekkóziniń aitýynsha, Ońtústik áskeri okrýgke jetekshilik etken armiia generaly Aleksandr Dvornikov jańa qolbasshy bolyp taǵaiyndalǵan. Ol buryn Resei áskeriniń Siriiadaǵy qimyldaryna jetekshilik etken.
BBC-diń jazýynsha, túrli reseilik áskeri okrýgtar arasynda koordinatsiianyń álsiz bolǵany Reseidiń Ýkrainadaǵy soǵysta qiyndyqqa ushyraýyna sebep bolǵan. General Dvornikovtyń aldynda jaǵdaidy ózgertip, koordinatsiiany kúsheitý mindeti tur.
Aqparatqa qaraǵanda, Resei áskerine 9 mamyrǵa deiin Ýkrainada qandai da bir "jetistikke jetý" jóninde tapsyrma berilgen. 9 mamyrda Máskeýde Resei prezidenti Vladimir Pýtinniń qatysýymen áskeri parad ótedi. Ýkraina soltústiginen áskerin áketken Reseidiń Donbasqa shabýyl jasaýǵa shuǵyl daiyndala bastaýyn osymen túsindirýge bolady. Buǵan qosa, Resei basshylyǵy qabyldai alatyn kelissóz nátijesi de "jetistik" retinde moiyndalýy múmkin.
Resei qorǵanys ministrligi qolbasshynyń aýysýyna bailanysty túsinikteme bermedi. Vedomstvo sonymen birge 24 aqpannan beri operatsiiaǵa kim jetekshilik etkenin habarlamaǵan.
- Pentagonnyń málimetinshe, qazir Resei Ýkrainaǵa basyp kirmei turǵan kezdegi áskeri qýatynyń 80-85 paiyzyna ie. Pentagonnyń tujyrymdaýynsha, olarǵa taǵy shamamen 60 myń áskeri qyzmetker qosylýy múmkin. Bálkim, zapastaǵy ofitserler esebinen tolyqtyrylýy yqtimal. Resei qorǵanys ministrligi operatsiiaǵa tek ofitserler men jaldamaly áskeri qyzmetkerler ǵana qatysyp jatyr deidi.
- Batys jáne Ýkraina barlaý qyzmetiniń málimetinshe, Resei áskeri Donbastaǵy ýkrain kúshterin qorshap, soqqy jasaý úshin Donbass pen Harkov oblystaryna shoǵyrlanyp jatyr. Ýkraina barlaý qyzmetiniń jetekshisi Kirill Býdanov Harkovke shabýyl jasalýy múmkin ekenin de joqqa shyǵarmady.
- Jýyrda Resei áskeri Ýkraina soltústigindegi úsh oblys – Kiev, Chernigov jáne Sýmy oblystarynan tolyq ketken. Máskeýdiń túsindirýinshe, bul jeńilgendikten ia bolmasa strategiiany ózgertý úshin emes, beibit kelissózdi jeńildetý maqsatynda jasalǵan.
