Atyraý oblysy qylmystyq ister jónindegi mamandandyrylǵan aýdanaralyq sotynda qala bazarlarynda bopsalaýshylyqpen ainalysqan top múshelerine úkim oqyldy, dep habarlaidy "Aq Jaiyq".
Sot barysynda jekpe-jektiń ár túrin jaqsy meńgergen uiymdasqan qylmystyq toptyń basshysy 2012 jyly Atyraýda úsh adamnan turatyn top qurǵany anyqtaldy. Osylaisha, bopsalaýshylar 8 jyl boiy "Dina" jáne "Kóktem" bazarlarynda Túrkistan oblysynan kelgen saýdagerlerden alym-salym jinaǵan.
Bas tartqan jaǵdaida olar taýardyń kózin joiyp, soqqyǵa jyǵyp nemese óltiremiz dep qorqytqan.
Nátijesinde aiyptalýshylardyń kinási tolyq dáleldengen. Olar óz is-áreketterine ókinbegen kórinedi.
Qylmystyq toptyń 33 jastaǵy basshysy 7 jyl 1 aiǵa bas bostandyǵynan aiyrylsa, taǵy ekeýine 7 jyldan jaza taǵaiyndalǵan. Olar jazasyn qatań rejimdegi koloniiada óteidi.
Basylymnyń jazýynsha, qylmystyq toptyń basshysy jekpe-jek, karate, jaýyngerlik sambo, djiý-djitsý jáne pankrationnan Qazaqstan chempiony. Halyqaralyq MMA jarystarynda el namysyn qorǵaǵan.
2015 jyldyń kókteminde Qytaida ótken týrnirde amerikalyqpen jekpe-jekke shyǵyp, tehnikalyq nokaýtpen jeńgen. Sonymen birge ol osy kezeńde Atyraý bazarlarynda bopsalaýshylyqpen ainalysyp kelgen.
Eske sala ketsek, ótken jyldyń maýsym aiynda elimizdiń Ulttyq qaýipsizdik qyzmeti osy qylmystyq toptyń jolyn keskenin habarlaǵan edi.
