Illiýstratsiialyq foto: ©Turar Qazanǵapov
Ekonomikalyq resýrstardyń zańsyz shoǵyrlanýyna qarsy kúres jónindegi vedomstvoaralyq komissiia satyp alý-satý sharttaryn jaramsyz dep taný jáne oligopoliia menshigine ótken nysandardy memleket menshigine qaitarý boiynsha jumys júrgizip jatyr, - dep habarlaidy Tengrinews.kz.
Komissiianyń resmi ókili Zeiin Álipbektiń aitýynsha, sottar jalpy somasy 13,5 milliard teńgege jýyq múlikti memleket menshigine qaitarý týraly prokýrordyń 10 talap aryzyn qarap jatyr.
Olardyń ishinde:
- elordalyq "Shapaǵat" bazary;
- Shymkent qalasyndaǵy qoqys óńdeý kásiporyndary – "Taza qala" MKK jáne "LTD Turmys" JShS;
- "Qazaq innovatsiialyq ýniversiteti" JShS menshigindegi Shymkent qalasyndaǵy 150 gektar jer telimi, quny 4,5 milliard teńge;
- "Saryaǵash" sanatoriia-kýrort kesheninen 1,44 gektar jer;
- Aqmola oblysynda 17 myń gektar jer;
- Almaty qalasynda quny 2,9 milliard teńge bolatyn 3,84 gektar jer;
- "Naiza-BN" JShS jarǵylyq kapitalynyń 65 paiyzy (Almaty qalasyndaǵy "Barys-4+" bazary) baǵalaý quny 1,5 milliard teńge.
"Budan basqa, aktivterdi keiinnen shyǵarý, ekonomikalyq resýrstardy monopoliialyq (oligopoliialyq) shoǵyrlandyrý maqsatynda memlekettik múlikti zańsyz ielený, mindettemelerden, onyń ishinde salyqtyq mindettemelerden jaltarý derekterin anyqtaý turǵysynan azamattyq ister boiynsha sot aktilerine tekserý júrgiziledi.
Qazir Joǵarǵy sot qaraýynda jalpy somasy 21 milliard teńgege oligopoliia ókilderi paidasyna jasalǵan sot sheshimderin qaita qaraý týraly Bas prokýratýranyń 11 narazylyǵy jatyr", - dedi Zeiin Álipbek.
