Foto: Ashyq derekkóz
Rýstam Qaraǵoishin "Báiterek" ulttyq basqarýshy holdinginiń tóraǵasy bolyp taǵaiyndaldy, dep habarlady kompaniianyń baspasóz qyzmeti.
"Báiterek" ulttyq basqarýshy holdingi" AQ direktorlar keńesiniń sheshimimen Rýstam Qaraǵoishin "Báiterek" ulttyq basqarýshy holdingi" AQ tóraǵasy bolyp sailandy", - delingen habarlamada.
Buǵan deiin ulttyq holdingtiń tóraǵasy Nurlan Baibazarov bolǵan. Alaida ol taiaýda ǵana Qazaqstan premer-ministriniń orynbasary – ulttyq ekonomika ministri bolyp taǵaiyndaldy.
Ómirbaiany
2004 jyly Rýstam Qaraǵoishin Qazaqstannyń menedjment, ekonomika jáne boljaý institýtyn "býhgalterlik esep" mamandyǵy boiynsha támamdady. 2008 jyly Halyqaralyq biznes akademiiasyn "Iskerlik basqarý magistri" baǵdarlamasy boiynsha aiaqtady.
Eńbek jolyn 2004 jyly "Qazaqstannyń Damý Banki" AQ ("QDB" AQ, "Báiterek" UBH" AQ qurylymyna kiredi) menedjer bolyp bastady, keiin bas menedjer, jobalardy taldaý bóliminiń basshysy bolyp jumys istedi, keiin "QDB" AQ enshiles kásiporny "QDB-Lizing" AQ-ǵa aýysty.
2007 jyly "QDB-Lizing" AQ basqarýshy direktory – basqarma múshesi bolyp taǵaiyndaldy. 2011 jyldan – Retroleum Operating JShS munai jáne munai ónimderiniń marketingi departamenti syrtqy ekonomikalyq qyzmet bóliminiń basshysy boldy.
2012 jyly Credit Systems JShS basqarma tóraǵasy bolyp jumys istedi. 2013 jyldan bastap "Sberbank Lizing" JShS bas direktorynyń orynbasary, keiin bas direktory qyzmetin atqardy. 2015 jyly "QazAgroQarjy" AQ basqarma tóraǵasynyń orynbasary bolyp taǵaiyndaldy.
2019 jyldan 2021 jylǵa deiin "Báiterek" ulttyq basqarýshy holdingi" AQ basqarma tóraǵasynyń orynbasary, onyń ishinde "Damý" kásipkerlikti damytý qory" AQ direktorlar keńesiniń múshesi jáne "Qazaqstan Damý banki" AQ direktorlar keńesiniń múshesi qyzmetin atqardy.
Ol Forbes 2023 nusqasy boiynsha Qazaqstandaǵy eń yqpaldy 50 biznesmenniń qataryna kiredi.
