Foto: Akorda.kz
Memleket basshysy "Báiterek" ulttyq basqarýshy holdingi" AQ basqarma tóraǵasy Nurlan Baibazarovty qabyldady, - dep habarlaidy "Ult aqparat" Aqordaǵa silteme jasap.
Qasym-Jomart Toqaevqa holdingtiń biylǵy 9 aidaǵy qyzmetiniń nátijeleri, sonyń ishinde kásipkerlik pen agroónerkásip keshenin qoldaý, halyqty turǵyn úimen qamtamasyz etý baǵytynda atqarylyp jatqan jumystar jóninde baiandaldy.
Prezidentke usynylǵan derekterge sáikes, investitsiialyq jobalardy qarjylandyrý kólemi 511 milliard teńgeni quraǵan. Sonymen qatar shaǵyn jáne orta biznestiń 18,1 myń jobasyna qoldaý kórsetilip, shamamen 1 trillion teńge kóleminde kredit berilgen. Agroónerkásip keshenin qoldaýǵa 447 milliard teńge qarjy bólingen. Jyl basynan beri 811,2 myń sharshy metr turǵyn úi paidalanýǵa berilip, 47 myńǵa jýyq otbasy baspanaly bolǵan.
Budan bólek, Memleket basshysyna holdingti transformatsiialaý jáne tsifrlandyrý úshin qabyldanyp jatqan sharalar týraly málimet berildi. «Báiterek» aldaǵy eki jylda ekonomikanyń shikizattyq emes sektoryn qoldaý aýqymyn eki ese arttyrmaq. Investitsiia tartý jáne kommertsiialyq bankterdi óńdeý ónerkásibi jobalaryn kreditteýge jumyldyrý jumystary jandana túsedi.
Ishki naryqty qamtamasyz etý jáne agroónerkásip kesheniniń eksporttyq áleýetin arttyrý maqsatynda tamaq ónerkásibi jobalaryn qarjylandyrý baǵdarlamalary iske qosylady, sondai-aq tolyqqandy eksport-kredit agenttigi qurylady.
Memleket basshysynyń monoqalalar, aýdan ortalyqtary men aýyl turǵyndaryn baspanamen qamtý jónindegi tapsyrmasyn oryndaý maqsatynda holdingtiń turǵyn úi baǵytyndaǵy qyzmeti tranformatsiialanady.
Nurlan Baibazarov holdingke enshiles uiymdardyń barlyq qyzmetin tsifrlyq formatqa kóshirý josparlanyp otyrǵanyn jetkizdi.
Kezdesý sońynda Memleket basshysy ekonomikalyq ósimdi qoldaý jáne azamattardyń turmys deńgeiin jaqsartý úshin jańa tásilder engizý mańyzdy ekenin atap ótti. Sondai-aq «Báiterek» holdinginiń jumysyn jetildirýge qatysty birqatar mindet júktedi.
