«Beeline Qazaqstan» bas atqarýshy direktory Evgenii Nastradin tariftik josparynyń qymbattaý sebebin túsindirdi, dep habarlaidy QazAqparat.
Ortalyq kommýnikatsiialar ortalyǵyndaǵy onlain baspasóz máslihatynda moderator suraq qoidy: «Kóptegen uialy bailanys operatorlarynda jańa oqý jyly qarsańynda jańa tariftik josparlar paida boldy. Meniń bilýimshe, mysaly, «Beeline» kompaniiasyndaǵy roýterler men modemder úshin naýryz-sáýir ailarynda 5 500 teńge, al qazir – 8 myń teńge tóleidi. Activ-tegi «Sýper Komfort M» tarifi 2390 teńge turdy. Endi bul tarif 1 qyrkúiekke deiin jaramdy bolyp, áleýmettik jelilerdegi sheksizdik joiyldy. Balalarǵa «Bilim» tarifi qoldanylady, jeli ishindegi qońyraýlar minýtyna 18 teńge, al qalǵany aqyly. Buǵan ne aitasyz?»
Evgenii Nastradin jańa tariftik josparlar men ózgermegen eskileri bar ekenin atap ótti.
«Jańa tariftik josparlarǵa kelsek, atalǵan somadan qoryqpańyzdar. Burynǵy 5 490 teńgelik tarifti bir qurylǵyda ǵana paidalanýǵa bolatyn. Al qazirgi 7 990 teńge somasyndaǵy tarifti bir qurylǵyda ǵana emes, telefonda da paidalanýǵa bolady. Eki tariftik jospar úshin artyq tóleýdiń qajeti joq. Biz tarifterdi jaqsarttyq, ishki jelige sheksiz qońyraýlar qostyq. Eger qosymsha satyp alsa, bul 11 myń teńge bolar edi», - dedi Evgenii Nastradin.
«Qazaqtelekom» AQ basqarma tóraǵasy Qýanyshbek Esekeevtiń aitýynsha, áleýmettik jeliler – bilim berý resýrstary bolyp sanalmaidy. Sondyqtan, olardyń qoljetimdi bolýyn operatorlar tarifpen belgileidi.
«Bizdegi naryq básekege toly. Siz «Bilim» tarifin aittyńyz, onyń qazaqstandyq bilim berý resýrstaryna qatysy bar. Al áleýmettik jeliler bilim berý resýrstaryna kirmeidi. Sondyqtan, árine, olardyń qoljetimdi bolýyn operatorlar tarifpen belgileidi. Mundai suraqtar týyndaýy zańdy. «Bilim» tarifinde bilim berý resýrstaryn tegin paidalanýǵa biregei múmkindik berdik. Árbir oqýshy qazaqstandyq resýrstardy paidalana alady», - dedi Qýanyshbek Esekeev.
