Baiqońyr qalasynda Qazaqstannyń 1 788 azamaty jumyssyz retinde tirkelgen. Bul jaiynda Májilis depýtattarynyń saýalyna QR Premer-Ministri Asqar Maminniń jaýabynda aitylǵan, dep habarlaidy "Ult aqparat".
«Búgingi kúni Baiqońyr qalasynyń halyq sany 77 299 adamdy quraidy, onyń ishinde 49 541-y – Qazaqstan Respýblikasynyń azamattary.
Qazaqstan Respýblikasynyń jáne Resei Federatsiiasynyń uiymdary men kásiporyndarynda jumys isteitin Qazaqstan Respýblikasy azamattarynyń sany shamamen – 11 000 adam. Halyqty jumyspen qamtý bóliminde tirkelgen Qazaqstan Respýblikasynyń jumyssyz azamattary – 1 788 adam», - dedi Úkimet basshysy.
Onyń atap ótýinshe, 2020 jylǵa arnalǵan respýblikalyq biýdjet jáne 2021-2023 jyldarǵa arnalǵan respýblikalyq biýdjet jobasy aiasynda Qyzylorda oblysy boiynsha jalaqyny ishinara sýbsidiialaýǵa (áleýmettik jumys oryndaryna) 1 mlrd teńge somasynda qarajat kózdelgen.
Baǵdarlama aiasynda jappai kásipkerlikti damytýǵa – 120 adamǵa 66,7 mln teńge somasyna memlekettik granttar berildi, áleýmettik jumystarǵa – 57 adam, jastar praktikasyna – 183 adam tartyldy, qoǵamdyq jumystarǵa – 280 adam jiberildi. Turaqty jáne ýaqytsha jumys oryndaryna 1070 adam jumysqa ornalastyryldy.
«Sondai-aq Baiqońyr qalasy boiynsha Nátijeli jumyspen qamtýdy jáne jappai kásipkerlikti damytýdyń 2017 – 2021 jyldarǵa arnalǵan «Eńbek» memlekettik baǵdarlamasynyń qatysýshysy 800 adam boldy. Onyń aiasynda halyqty qaita daiarlaý jáne biliktiligin arttyrý úshin qysqa merzimdi kásiptik oqytý kýrstaryna eńbek naryǵynda suranysqa ie mamandyqtar boiynsha 10 adam jiberildi», - dedi Asqar Mamin.
