Baiqońyr qalasy ákimshiligi basshysynyń qaýlysymen shahar aýmaǵynda koronavirýs infektsiiana qatysty shekteý sharalary 1 aqpanǵa deiin uzartyldy, dep habarlaidy "Ult aqparat".
Buǵan deiin Baiqońyrda karantin 2021 jyldyń 18 qańtaryna deiin engizilgen bolatyn. Epidahýaldyń órshýine syrttan ákelingen jańa jaǵdailar sebep bolǵan.
Resei federaldy meditsinalyq-biologiialyq agenttiginiń «Baiqońyr» kesheni óńirlik basqarmasynyń málimetinshe, 2020 jyldyń 26 jeltoqsanynan 2021 jyldyń 15 qańtar aralyǵynda 38 baiqońyrlyq turǵyn koronavirýs juqtyrǵan. Tirkelgen jaǵdailardyń jalpy sany 1124-ten 1162 adamǵa deiin artty. Infektsiialyq statsionarda 7 adam emdelip jatyr, sońǵy úsh aptada ólim jaǵdailary bolǵan joq. Pandemiia bastalǵannan beri Baiqońyrdyń 70 turǵyny koronavirýs aýrýynan qaitys boldy.
Baiqońyrda qoldanystaǵy shekteý sharalary saqtalýda. Jedel shtab turǵyndardy jabyq úi-jailarǵa barǵanda maska rejimin, áleýmettik qashyqtyqty, sanitarlyq erejeler men jeke gigienany qatań saqtaýǵa shaqyrady.
