Baiqońyr – kúlli adamzattyń igiligi, onyń álemdik kosmonavtikadaǵy tarihi róli zor. Bul pikirdi Memleket basshysy Qasym-Jomart Toqaev Reseidiń «Komsomolskaia pravda» gazetine bergen suhbatynda aitty, dep habarlaidy QazAqparat.
«Ǵarysh salasyndaǵy birlesken ózara is-qimyldar men Baiqońyr qalasyn birlesip damytý isi – Qazaqstan men Reseidiń kópjaqty yntymaqtastyǵynyń aiqyn kórinisi. Ǵarysh ailaǵynyń tirshiligi men onyń tiimdi damý máselelerin Úkimetaralyq komissiia qarastyrady. Ásirese, bailanys, televiziia jáne ǵylymi zertteýler salasynda qoldanylatyn azamattyq ǵarysh apparattaryn qurý máselesine basymdyq beriledi. «Gagarin starty» jobasy boiynsha birlesken jumystar atqarylýda. Ǵaryshqa jol ashqan osy tarihi alańdy jańǵyrtýǵa Qazaqstan, Resei jáne BAÁ investorlary qarajat salýǵa nietti», - dedi Q. Toqaev.
Sonymen birge, Prezident ýytty otyn paidalanatyn «Proton» zymyranynyń ornyna ekologiialyq taza tasymaldaýshylarda apparat ushyrýdy kózdeitin «Báiterek» keshenin eske saldy.
«Eki el ekonomikasynyń damýyna aitarlyqtai úles qosa alatyn «Baiqońyr» erkin ekonomikalyq aimaǵyn qurý týraly Qazaqstannyń bastamasyn erekshe atap ótkim keledi. Biyl qazan aiynda ǵarysh ailaǵynyń salynǵanyna 65 jyl tolady. Bizdiń elderimiz bul ataýly datany laiyqty dárejede atap ótýi kerek dep sanaimyn. Óitkeni Baiqońyr – búkil adamzattyń igiligi. Onyń álemdik kosmonavtikadaǵy tarihi róli zor», - dedi Qasym-Jomart Toqaev.
