Búgin Baiqońyr qalasynda shahar nysandaryn Qazaqstannyń gazben qamtý júiesine qosýǵa arnalǵan saltanatty shara ótti, dep habarlaidy "Ult aqparat" «QazTransGaz» AQ baspasóz qyzmetine silteme jasap.
Oǵan Qyzylorda oblysynyń ákimi Qyrymbek Kósherbaev, «QazTransGaz Aimaq» AQ Bas direktory Manas Tasybaev jáne Baiqońyr qalasy ákimshiliginiń basshysy Konstantin Býsygin qatysty.
Osyǵan deiin suiytylǵan gaz paidalanyp kelgen Baiqońyr qalasynyń turǵyndary úshin bul - aitýly oqiǵa. Tabiǵi kógildir otynǵa kóshýdiń artyqshylyqtary aiqyn - tabiǵi gazdy turmysta paidalaný áldeqaida qolaily ári qaýipsiz, ózge otyn túrlerimen salystyrǵanda baǵasy da aitarlyqtai arzan. Qalaǵa tabiǵi gaz berilýi - shaǵyn jáne orta biznesti damytyp, jańa jumys oryndaryn ashýǵa, iaǵni áleýmettik-ekonomikalyq ósimge jol ashylady.
Alǵashqy 6 turǵyn úiden ózge, 6 mektep pen 1 balabaqsha kógildir otyn qubyryna jalǵandy. Gaz avtonomdy qazandyqtarǵa da berilýde.
Baiqońyr qalasyn Qazaqstannyń tabiǵi gazyna qosý úshin ulttyq operator «QazTransGaz» AQ óz qarajaty esebinen qajetti infraqurylymdy tolyǵymen saldy. «Beineý-Bozoi-Shymkent» magistraldyq gaz qubyrynan «Baiqońyr» avtomattandyrylǵan gaz taratý stantsiiasyna (AGTS) deiin uzyndyǵy 4 shaqyrymdyq burma gaz qubyry salyndy. Al AGTS-ten qalaǵa deiin uzyndyǵy 10 shaqyrym jetkizýshi gaz qubyry tóseldi. Qala ishindegi qubyrlardyń uzyndyǵy 33,5 shaqyrymnan asady. Qalada 20,6 myń abonentti gaz qubyryna qosý josparlanyp otyr, bul - 300 asa kóppáterli úi.
Biyl maýsym aiynda ótken «Baiqońyr» kesheni jónindegi Resei-Qazaqstan úkimetaralyq komissiiasynyń 5-shi otyrysynda, «QazTransGaz» AQ, Qyzylorda oblysynyń ákimdigi, Baiqońyr qalasynyń ákimshiligi, «TsENKI» FUBB arasyndaǵy yntymaqtastyq arqasynda qalany gazdandyrý syzbasy bekitildi.
19 qazanda Astanada Baiqońyr tarihynda tuńǵysh ret «Gaz sharýashylyǵy» qalalyq birtutas mekemesi, «QazTransGaz» AQ jáne «QazTransGaz Aimaq» AQ arasynda kelisimge qol qoiyldy. Kelisim negizinde qaladaǵy nysandar tabiǵi gaz tutyna bastady.
Baiqońyr qalasyn gazdandyrýǵa arnalǵan jumystar 2014 jyly bastaý aldy. Sol jyly qarasha aiynda «Beineý-Bozoi-Shymkent» magistraldyq gaz qubyrynan «Baiqońyr» avtomattandyrylǵan gaz taratý stantsiiasyna deiingi burma gaz qubyrynyń qurylysy bastaldy.
Bul nysan ulttyq operator «QazTransGaz» júzege asyrǵan «Qyzylorda oblysynyń 5 eldi mekenin gazdandyrý» aýqymdy investitsiialyq jobasynyń aiasynda turǵyzyldy.
Aita ketken jón, «Qyzylorda oblysynyń 5 eldi mekenin gazdandyrý» investitsiialyq jobasy 2013 jyly Qyzylorda oblysy ákimdigi men «QazTransGaz Aimaq» AQ arasynda qol qoiylǵan memorandým sheńberinde júzege asyryldy. Joba aiasynda Baiqońyr men Aral qalalary jáne Shieli, Jańaqorǵan, Áiteke bi kentterinde 5 AGTS pen kóshearalyq gaz qubyrlary salyndy. Osynyń arqasynda óńirdiń 200 myńǵa tarta turǵyny tabiǵi gazdy tutyný múmkindigine ie boldy. Baiqońyr qalasy jylyna orta eseppen 1650 tonna suiytylǵan gaz paidalanady.
