Túrkistan oblysy Báidibek aýdanyndaǵy mádeniet úiinde halqymyzdyń eń qymbat, eń asqaq merekesi 16 jeltoqsan – Táýelsizdik kúni saltanatty túrde atalyp ótti, dep habarlaidy "Ult aqparat".
Aýdan ákimi Baqytbek Tanagózov turǵyndardy merekemen quttyqtady.
«Búgingi merekelerińizben shyn júrekten quttyqtaimyn! Qazaqta: «Baǵalamaǵannan baq kóshedi» degen sóz bar. Bul maqaldy aityp turǵan sebebim, búgingi mereke - merekelerdiń eń ulyǵy, merekelerdiń tóresi. Osy táýelsizdikke jete almai kóptegen halyqtar qiynshylyq kórýde. Búkil Dúnie júzi boiynsha myńnan asa ulttar men ulystar bar eken. Sonyń ishinde tek qana eki júz ulttyń óz aldyna memleketi bar. Ol degen sóz arǵy jaǵyndaǵy segiz júzden asa ult pen ulystar bir memlekettiń qaramaǵyna kirip, solardyń degenimen júrýde.
Al endi, osyndai bir baqtyń, berekeniń, jaqsylyqtyń bizge kele qalýy ǵanibettiń ǵanibeti bolyp tur. Mynaý táýelsizdikti moiyndaý, baǵalaý, qurmetteý, bul - eń qajetti dúnie. Keshe, ózderińiz bilesizder, Elbasy «Uly dalanyń jeti qyry» degen úlken maqala jariialady. Ony bizdiń kórshiles túrki memleketter moiyndap, birden osy maqalaǵa ún qatyp, osyndaǵy aitylǵan máselelerge jaýap qaitardy. Maqsat – uly dalany tanytý», - dedi ol.
Jyldyń qorytyndysy negizinde aýdannyń áleýmettik-ekonomikalyq jáne mádeni damýyna qosqan eleýli úlesi men qoǵamdyq qyzmette sińirgen belsendi eńbegi úshin túrli salalar boiynsha jyl úzdikteri de merekelik shara barysynda marapattaldy. Odan soń, aýdandyq máslihat hatshysy Muqadas Naqypbekov, «Nur Otan» pariiasy aýdandyq filialy tóraǵasynyń birinshi orynbasary Tursynáli Dúisenbekov quttyqtaý sóz sóilep, aýdandyq máslihattyń, «Nur Otan» partiiasynyń gramotalary men «Alǵys hattaryn» bir top ozattarǵa tapsyrdy.
Merekede aýdandyq mádeniet úiiniń ónerpazdary men M.Áýezov atyndaǵy jalpy orta mektebiniń oqýshylary óner kórsetti.
