"Biz jeńýge jaqyn qadyq" dedi AQSh prezidenttiginen úmitker, Demokratiialyq partiia ókili Djo Baiden Delaver shtatynyń Ýilmington qalasynda jaqtastarynyń aldynda juma kúni túnde sóilegen sózinde. Baiden ótkizgen jiynǵa vitse-prezidenttikten úmitker, kaliforniiadan sailanǵan senator Kamala Harris qatysty.
BBC-diń habarlaýynsha, Baiden bul sailaýda AQSh sailaýshylar alqasynyń 300-den astamynyń daýysyn jinaitynyn aitqan. Oǵan shamamen 74 million adam daýys bergen, bul – AQSh tarihyndaǵy eń úlken kórsetkish.
Jalpy AQSh boiynsha Baiden Tramptan 4 milliondai kóp daýys alǵan.
Baiden koronavirýs pandemiiasymen kúresip, ekonomikany ońaltýda, klimattyń ózgerýimen kúresip, násilshildikti joiýda Amerika halqy ózine senim bildirgenin aitty.
Ol prezident sailaýynda qazirgi memleket basshysy Donald Trampty jeńýge sanaýly qadam qaldy dedi.
Demokratiialyq partiia atynan úmitker Djozef Baiden qazir sailaýshylar alqasynda 253 daýysty alyp tur. Prezident bolyp sailaný úshin 270 daýys jetkilikti. Daýys nátijesi áli aiqyn emes Djordjiia, Nevada, Pensilvaniia jáne Arizona shtattarynyń bárinde Baiden az-maz basymdyqpen jeńip keledi.
Jeńiske jetse, Baiden keler jylǵy 20 qańtarda AQSh prezidenti qyzmetine kirisedi.
Asa tartysty ótken sailaý naýqanynda ol "saiasattan totiiaiyndy alyp tastap", "bir-birimizge qurmetpen qaraityn" kez keldi dedi.
