©NPR
Sársenbi, 21 qyrkúiekte AQSh prezidenti Djo Baiden BUU Bas assambleiasynyń sessiiasynda sóz sóiledi, - dep habarlaidy Tengrinews.kz tilshisi "Golos Ameriki" basylymyna silteme jasap.
Baiden óz sózinde Reseidi Ýkrainaǵa basyp kirýge bailanysty BUU músheliginiń negizgi qaǵidalaryn buzdy dep aiyptap, Máskeýdiń iadrolyq qarý qoldanamyn dep qorqytyp otyrǵanyn málimdedi.
"BUU Qaýipsizdik Keńesiniń turaqty múshesi Resei, egemendi eldi álem kartasynan óshirýge tyrysyp, basyp kirdi. Sondai-aq, el prezidenti Pýtin iadrolyq qarý qoldanatynyn aityp sóz sóiledi. Bul el osy áretterimen BUU jarǵysynyń negizgi erejelerin buzyp otyr", - dedi Amerika prezidenti.
Baiden Kreml Ýkrainanyń keibir bólikterin anneksiialaý úshin jalǵan referendým uiymdastyryp jatqanyn, bul BUU jarǵysyn óte aýyr túrde buzý ekenin, jáne Pýtin bul áreketterdiń bárin "Reseige qaýip tóndi" dep aqtap alǵanyn aitty.
AQSh prezidenti munyń shyndyqqa janaspaitynyna basa nazar aýdardy.
"Reseidi eshkim qorqytqan joq, Reseiden basqa eshkim janjal izdegen joq. Shyn máninde, biz osylai bolatynyn eskertken edik", - dedi ol.
Baiden AQSh-tyń bul soǵystyń aiaqtalýyn qalaitynyn da aityp, egemendi memleketterden aýmaqty kúshpen tartyp alýǵa eshkimniń quqyǵy joq ekenin eskertti.
Aq úi basshysy AQSh odaqtastarymen birge "Reseidi jaýyzdyq pen áskeri qylmystar úshin jaýapqa tartý úshin" barlyǵyn jasap jatqanyn aitty.
Ol Birikken Ulttar Uiymyna múshe árbir el Ýkrainanyń kez kelgen egemen memleket siiaqty quqyqtaryna ie bolýyn qatań túrde talap etý kerektigin atap ótti.
