AQSh prezidenti Djo Baiden jýrnalist Roman Protasevichti bosatýdy talap etti, - dep habarlaidy "Ult aqparat" Aq úidiń saityna silteme jasap.
Amerika kóshbasshysy Belarýste Ryanair ushaǵynyń májbúrli qonýyn halyqaralyq normalardy qorlaý ekenin aityp, kinálilerdi jaýapqa tartý sharalaryn ázirleýdi tapsyrdy.
"Bul óreskel oqiǵa hám Protasevich myrzany májbúrlep túsirgen bolýy múmkin video saiasi kózqarastarǵa da, baspasóz bostandyǵyna da masqara shabýyl boldy. Amerika Qurama Shtattary búkil álem elderimen birge ony bosatýdy, sondai-aq Lýkashenko rejimi ádiletsiz ustap otyrǵan júzdegen saiasi tutqyndy bosatýdy talap etedi", - delingen Baiden málimdemesinde.
Ol, sondai-aq, óz komandasynan kinálilerdi jaýapqa tartýdyń tiisti nusqalaryn Eýropalyq Odaqpen jáne basqa da seriktestermen, halyqaralyq uiymdarmen tyǵyz yntymaqtastyqta ázirleýdi suraǵanyn aitty.
AQSh prezidenti Belarýs halqyn sózsiz qoldaitynyn aitty.
"Men negizgi quqyqtary úshin kúresip júrgen belorýstardyń, sonyń ishinde Roman Protasevich siiaqty jýrnalisterdiń jáne Svetlana Tihanovskaia men onyń jubaiy Sergei Tihanovskii siiaqty oppozitsiia jetekshileriniń batyldyǵy men sheshimdigine qol soǵamyn. Amerika Qurama Shtattary Belarýs halqyna onyń kúresinde qoldaý kórsetýdi jalǵastyrady", - dedi Baiden.
