Búgin, 16 maýsymda Jenevada AQSh prezidenti Djo Baiden men Resei prezidenti Vladimir Pýtinniń kezdesýi bastaldy. Ekeýi prezident retinde alǵash ret kezdesip otyr. Baiden men Pýtin kezdesýi Máskeý men Vashington arasyndaǵy qarym-qatynas nasharlaǵan tusta ótip jatyr.
Eki eldiń basshysy sammiti Jeneva qalasynyń jekemenshigi sanalatyn La Granj tarihi villasynda ótedi. Kelissóz Nur-Sultan ýaqytymen 17:25 kezinde bastalyp, bes saǵatqa sozylady dep josparlanǵan. Kezdesýden soń eki eldiń prezidenti jeke-jeke baspasóz máslihatyn uiymdastyrýy tiis. Sammit kezinde qandai da bir qujatqa qol qoiylatyn-qoiylmaityny aitylǵan joq.
Pýtin Jenevaǵa búgin, 16 maýsym tús aýa jetti. Al Baiden 15 maýsymda kelgen.
Kezdesý aldynda eki tarap kelissóz tártibi bir-birine sai kelmeitinin málimdegen. Máskeý ǵalamdyq qaýipsizdik, qarýlanýdy shekteý jáne geosaiasi máselelerdi talqylaǵysy keledi. Al AQSh Reseige naqty talaptar qoiyp, kibershabýyl, reseilik arnaiy qyzmetkerlerdiń sheteldegi operatsiialary, oppozitsiiany, sonyń ishinde Aleksei Navalnyidy qýdalaý, baspasóz erkindigi, Ýkrainanyń shyǵysyndaǵy jáne Minskidegi jaǵdaidy talqylaýy múmkin.
Sammit basynda Pýtin Baidenge kezdesý uiymdastyrýdy "usynǵanyna" alǵys aityp, Jenevadaǵy jiyn nátijeli bolady dep úmittenetinin jetkizgen. Baiden de Pýtinge alǵys bildirip, kezdesýde Resei men AQSh-tyń qai salalarda seriktestik ornata alatyny anyqtalar degen.
Jenevadaǵy kelissóz Baidenniń bastamasymen ótip jatyr. AQSh prezidenti Pýtinmen kezdesýge deiin G7 elderi liderleriniń jáne NATO sammitine qatysqan. Resei 2014 jyly Qyrymdy aneksiialap alǵan soń "Úlken jetilik" sammitinen shyǵarylǵan.
