بٷگٸن, 16 ماۋسىمدا جەنەۆادا اقش پرەزيدەنتٸ دجو بايدەن مەن رەسەي پرەزيدەنتٸ ۆلاديمير پۋتيننٸڭ كەزدەسۋٸ باستالدى. ەكەۋٸ پرەزيدەنت رەتٸندە العاش رەت كەزدەسٸپ وتىر. بايدەن مەن پۋتين كەزدەسۋٸ مەسكەۋ مەن ۆاشينگتون اراسىنداعى قارىم-قاتىناس ناشارلاعان تۇستا ٶتٸپ جاتىر.
ەكٸ ەلدٸڭ باسشىسى سامميتٸ جەنەۆا قالاسىنىڭ جەكەمەنشٸگٸ سانالاتىن لا گرانج تاريحي ۆيللاسىندا ٶتەدٸ. كەلٸسسٶز نۇر-سۇلتان ۋاقىتىمەن 17:25 كەزٸندە باستالىپ, بەس ساعاتقا سوزىلادى دەپ جوسپارلانعان. كەزدەسۋدەن سوڭ ەكٸ ەلدٸڭ پرەزيدەنتٸ جەكە-جەكە باسپاسٶز مەسليحاتىن ۇيىمداستىرۋى تيٸس. سامميت كەزٸندە قانداي دا بٸر قۇجاتقا قول قويىلاتىن-قويىلمايتىنى ايتىلعان جوق.
پۋتين جەنەۆاعا بٷگٸن, 16 ماۋسىم تٷس اۋا جەتتٸ. ال بايدەن 15 ماۋسىمدا كەلگەن.
كەزدەسۋ الدىندا ەكٸ تاراپ كەلٸسسٶز تەرتٸبٸ بٸر-بٸرٸنە ساي كەلمەيتٸنٸن مەلٸمدەگەن. مەسكەۋ عالامدىق قاۋٸپسٸزدٸك, قارۋلانۋدى شەكتەۋ جەنە گەوساياسي مەسەلەلەردٸ تالقىلاعىسى كەلەدٸ. ال اقش رەسەيگە ناقتى تالاپتار قويىپ, كيبەرشابۋىل, رەسەيلٸك ارنايى قىزمەتكەرلەردٸڭ شەتەلدەگٸ وپەراتسييالارى, وپپوزيتسييانى, سونىڭ ٸشٸندە الەكسەي ناۆالنىيدى قۋدالاۋ, باسپاسٶز ەركٸندٸگٸ, ۋكراينانىڭ شىعىسىنداعى جەنە مينسكٸدەگٸ جاعدايدى تالقىلاۋى مٷمكٸن.
سامميت باسىندا پۋتين بايدەنگە كەزدەسۋ ۇيىمداستىرۋدى "ۇسىنعانىنا" العىس ايتىپ, جەنەۆاداعى جيىن نەتيجەلٸ بولادى دەپ ٷمٸتتەنەتٸنٸن جەتكٸزگەن. بايدەن دە پۋتينگە العىس بٸلدٸرٸپ, كەزدەسۋدە رەسەي مەن اقش-تىڭ قاي سالالاردا سەرٸكتەستٸك ورناتا الاتىنى انىقتالار دەگەن.
جەنەۆاداعى كەلٸسسٶز بايدەننٸڭ باستاماسىمەن ٶتٸپ جاتىر. اقش پرەزيدەنتٸ پۋتينمەن كەزدەسۋگە دەيٸن G7 ەلدەرٸ ليدەرلەرٸنٸڭ جەنە ناتو سامميتٸنە قاتىسقان. رەسەي 2014 جىلى قىرىمدى انەكسييالاپ العان سوڭ "ٷلكەن جەتٸلٸك" سامميتٸنەن شىعارىلعان.
