Sotta Baýyrjan Baibektiń múddesin qorǵaityn zańger Aijan Tashenova óziniń Facebook jelisindegi paraqshasynda Janbolat Mamai men Inga Imanbaiǵa qarsy istiń júrý barysy jóninde aitty, dep habarlaidy "Ult aqparat".
"Qurmetti dostar!
B.Baibektiń ar-namysyn, qadir-qasietin jáne iskerlik bedelin qorǵaý týraly J. Mamai men I.Imanbaevaǵa qatysty bergen talap aryzyma bailanysty sot keshe taraptardy mediatsiia júrgizý úshin 6 mamyrǵa áńgimelesý taǵaiyndaǵany týraly habardar etti.
Habarlamaǵa sáikes tatýlastyrý protsesi onlain rejimde telefon arqyly ótedi. 4 mamyrdaǵy jazbamda men jaýapkerlerdi aldaǵy áńgime týraly qosymsha habardar ete otyryp «tegtedim».
Azamattyq protsestik kodekstiń 150 jáne 174-baptaryna sáikes sot taraptarǵa protsestiń barlyq satysynda daýdy retteýge járdemdese otyryp, olardyń tatýlasýy úshin sharalar qabyldaitynyn túsindirip óteiin.
Buǵan deiin habarlaǵanymdai, B.Baibek azamattyq is qaraýmen shektelip, jaýapkerlerdi qylmystyq jáne ákimshilik qýdalaýdan bas tartty. Onyń basty maqsaty – J.Mamai men I. Imanbaeva taratqan málimetterdiń jalǵan ekenin dáleldep, óziniń abyroiyn qalpyna keltirý.
Osylaisha, 5 kún buryn men J.Mamai men I.Imanbaevanyń jalǵan dáiekterin tolyǵymen joqqa shyǵaratyn 20-dan astam resmi qujat (sot sheshimderi, ákimdik qaýlylary jáne t. b.) tizimdelgen talap aryz jariialadym. Sonymen qatar bul materialdar sol kezdegi barlyq sheshim tek qoǵam men memleket múddeleri úshin qabyldanǵanyn kórsetedi. Osy faktilerdiń barlyǵy B.Baibektiń 19 sáýirdegi suhbatynda baiandaldy.
Sonymen qatar, jaýapkerler negizsiz jáne dálelsiz aiyptaýlary bar beine jáne baspa materialdaryn YouTube pen áleýmettik jelilerde salýyn jalǵastyryp jatyr.
Osyǵan qaramastan, biz mediativti kelisim jasasýǵa (tatýlasýǵa) jáne sot protsesi bastalǵanǵa deiin jaǵdaidy kelesi sharttarmen sheshýge daiynbyz. Sonymen, jaýapkerler:
1) tiisti áleýmettik jelilerde jáne YouTube-ta B.Baibekke qatysty jalǵan, negizsiz málimetterdi teriske shyǵarýy kerek;
2) meniń senim bildirýshimniń ar-namysy men qadir-qasietine nuqsan keltiretin materialdardy alyp tastaýy tiis.
Sóz sońynda aitarym, osy taqyryp boiynsha haip qýmaý jaily ótinishterime qaramastan, bul Azamattyq protsestik kodekstiń talaptaryna zańdy túrde sáikes kelmeitini týraly pikir bildiretin keibir paidalanýshylar tarapynan qoǵamdy osy talap aryzdyń mán-jaiynan alshaqtatýǵa áreketter jasalǵanyn kórip júrmin.
Men talap aryz zańnyń barlyq talaptaryna tolyǵymen sáikes keletinin jaýapkershilikpen málimdeimin. Onyń mátini (taraptardyń jeke derekterin qospaǵanda) meniń 30 sáýirdegi jazbamda qosa berilgen, osylaisha árbir adam oǵan kóz jetkizýi kerek.
10 jumys kúni ishinde sot talap aryzdy is júrgizýge qabyldaý nemese ony qaitarý týraly uiǵarym shyǵarady, sol arqyly osy máselege núkte qoiady.
Sizderge osy azamattyq is júrgizýdiń barysy týraly ári qarai da habarlaityn bolamyn" dep jazdy advokat.
