Buqaralyq aqparat quraldarynyń ókilderimen ortalyq kommýnikatsiialar qyzmetinde baspasóz máslihatyn ótkizgen Almatynyń ákimi Baýyrjan Baibek qalanyń ekonomikalyq álemýttik-ekonomikalyq damýy kórsetkishteri týraly aityp berdi, dep habarlaidy QazAqparat.
«Jalpy qalanyń ekonomikalyq kórsetkishteri, ásirese aǵymdaǵy jyldaǵy jahandyq ekonomikalyq máselelerdi eskersek, oń nátije kórsetip otyr. Biylǵy jyldyń birinshi jartyjyldyǵy boiynsha qalanyń JIÓ 4 paiyzǵa artyp, 4,4 trillion teńgeni qurady. Búgingi tańda Almaty shaharyna respýblikanyń JIÓ-niń besten bir bóligi tiesili. Naqtyraq aitqanda, memleketimizdegi halyqtyń 10 paiyzdan astamy turatyn Almaty qalasy JIÓ-niń 22,6 paiyzyn, barlyq salyq túsimderiniń tórtten birinen astamyn qamtamasyz etip otyr», - deidi Almaty ákimi.
Baýyrjan Baibek sonymen birge, Memleket basshysynyń Almatyǵa sapary kezinde qandai tapsyrmalar berilgenin jetkizdi.
«Búgingi tańda Almaty - iri óńirlik magnit. Qyrkúiek aiynda Elbasy Nursultan Ábishuly Almatyǵa arnaiy kelip, qalamyzdaǵy birqatar ózgerister men jańa áleýmettik nysandarmen, jańarǵan kóshelermen tanysyp, baǵasyn berip ketken bolatyn. Almatyny damytý boiynsha Memleket basshysy keńes ótkizip, kópten beri sheshilmei kele jatqan Úlken Almaty ainalma jolynyń qurylysyna kirisý, Almaty áýejaiyn jańǵyrtý, TETs-2-ni gazǵa kóshirý boiynsha birqatar tapsyrmalar berip ketti. Almaty Bas jospary institýtyn qurý týraly tapsyrmany oryndap ta qoidyq», - deidi qala ákimi.
Onyń aitýynsha, megaopoliste biylǵy jyly barlyq áleýmettik-ekonomikalyq kórsetkishter boiynsha oń dinamika qalyptasqan, negizgi kapital investitsiiasy 12,8 paiyzǵa ósip, 400,5 mlrd teńgege jetkenin aityp berdi. Bul turǵyda syrtqy investitsiialar 23,5 paiyzǵa artqan.
