Bileýshi partiianyń Tóraǵasy laýazymyn Qasym-Jomart Kemelulyna tapsyrý – bul zańdylyq, qazaqstandyq bilik tranzitine tolyqtai sáikes keletin sheshim. «Nur Otan» partiiasy Tóraǵasynyń birinshi orynbasary Baýyrjan Baibek osyndai pikir bildirdi, dep habarlaidy QazAqparat atalmysh saiasi uiymnyń baspasóz qyzmetine silteme jasap.
«Qasym-Jomart Kemeluly «Nur Otan» qurylǵannan bastap onyń basy-qasynda. Uzaq ýaqyt partiianyń basqarýshy jáne mańyzdy sheshimder qabyldaýshy organy – Saiasi Keńes Biýrosynyń múshesi bolyp tabylady.
2019 jyly Prezident laýazymyna kandidat retinde Qasym-Jomart Kemeluly osy «Nur Otan»-nan usynyldy. Sońǵy parlament sailaýynda partiia Memleket basshysy ózi jariia etken sailaýaldy baǵdarlamamen aiqyn jeńiske jetti. Sol berilgen ýádelerdi oryndaý – bileýshi partiianyń qazirgi ýaqyttaǵy basty mindeti.
Elbasy atap ótkendei, qazir «Nur Otan» qoǵamdy Prezidentimizdiń Memlekettik baǵdary tóńiregine toptastyrýy qajet.
Bul sheshim el ishindegi jáne syrtyndaǵy barlyq taraptarǵa biliktiń tutastyǵyn jáne onyń sabaqtastyq saiasatyna tolyqtai berik ekendigin kórsetedi. Qosarlanǵan bilik týraly aitylǵan barlyq negizsiz pikirler men orynsyz uiǵarymdardy teriske shyǵaratyn qadam.
Elbasynyń el úshin jáne bileýshi partiia úshin osyndai mańyzdy sheshimdi Táýelsizdigimizdiń 30 jyldyǵynda qabyldaýy úlken simvoldyq mánge ie dep bilemin», - dep atap ótti Baýyrjan Baibek.
