Tanymal prodiýser Baian Maqsatqyzynyń burynǵy jubaiy biznesmen Baqytbek Esentaev merziminen buryn bosatýdy surady, - dep habarlaidy Tengrinews.kz agenttigi Almaty oblystyq sotyna silteme jasap.
Sot málimetinshe, ótinishti Qapshaǵai (qazirgi Qonaev - avtor.) qalalyq soty qaraidy.
"Sottalǵan Baqytbek Esentaevty merziminen buryn shartty túrde bosatý týraly ótinish Qapshaǵai qalalyq sotyna tústi. Tyńdaý kúni 11 shildege belgilendi", - dedi Almaty oblystyq sotyndaǵylar.
Eske salaiyq, Baqytbek Esentaev 2016 jyldyń qarashasynda sottalǵan bolatyn. Ol áieline qatysty "Adam óltirý áreketi" úshin kináli dep tanylyp, 9 jylǵa bas bostandyǵynan aiyryldy. Zańǵa sáikes, mundai qylmys "asa aýyr" sanatyna jatady. Sondyqtan, sottalǵandar jaza merziminiń keminde úshten ekisi ótelgennen keiin ǵana shartty túrde merziminen buryn bosatýdy surai alady. Bul kezeń Esentaev úshin osy jyldyń maýsymyna keledi.
