Foto: Ashyq derekkóz
Qazaqstannyń halyq ártisi Maqpal Júnisova áleýmettik jelidegi paraqshasynda video jariialap, marqum kompozitor Arman Dúisenovtiń jary Aisulý Aidanqyzynyń qazirgi jaǵdaiyna alańdaitynyn málimdedi, dep habarlaidy Ult.kz.
Ánshi eń áýeli óziniń Aidanqyzyna páter alyp berýge qarjylyq múmkindigi jetpeitinin ashyq aitty. Soǵan qaramastan, ol máseleni sheshýge bolar joldardy qarastyrý maqsatynda qala ákimdigimen kezdeskenin jetkizdi.
“Jelide Arman Dúisenovtiń jary túrli jaǵdaiyn aityp júr. Shynymdy aitsam, júregim aýyrady. Men bai otbasynyń ókili emespin, óz eńbegimmen tapqan tabysymdy ǵana igerip júrgen adammyn. Eger jaǵdaiym kelse, esh oilanbastan kómekteser edim. Biraq qazir páter alyp beremin dep aita almaimyn”, – dedi Maqpal Júnisova.
Óner iesi ótken jyldary ákimdik tarapynan mádeniet qyzmetkerlerin baspanamen qamtamasyz etý tájiribeleri bolǵanyn eske saldy.
“Ákimdik ókilderimen aqyldasyp kórdim. Buryn Zákeń talai óner adamyna kezeksiz páter beretin. Sherhan Murtaza bir kúnde 60 páter alyp bergenin, teleradio qyzmetkerlerin baspanamen qamtyǵanyn bárimiz bilemiz. Oljas Súleimenov te 20-ǵa jýyq páter sheship bergen. Ol kezde ákimdiktiń balansynda úi kóp bolatyn. Tasmaǵambetovtyń tusynda da solai edi. Qazir ondai zań da, úi de joq”, – dedi ol.
Ánshiniń aitýynsha, qazirgi jaǵdaida naqty kómek bere alýy múmkin jalǵyz adam — Baian Maqsatqyzy.
“Men senetin bir adam bar — ol Baian Maqsatqyzy. Baiannyń joldasy aýqatty azamat. Árine, adam óz otbasynyń jaǵdaiyn jaqsartý úshin jumys isteidi. Biraq Arman Dúisenov Baiandy qatty qurmettegen, onyń jobalaryna jii atsalysqan. Sondyqtan osy máseleni sheshýde Baian kómektesse degen úmitim bar. Ózim de múmkindiginshe qarajat jinap beremin. Biraq bári birigip qoldasa durys bolar edi”, – dedi ol.
Aita keteiik, kompozitor Arman Dúisenov 2023 jyldyń qańtarynda kóz jumǵan. Al byltyr qazanda marqumnyń uly qaiǵyly jaǵdaida dúnieden ótti. 7 qazan kúni ol óz páterinde asylyp qalǵan kúiinde tabylǵan. Aldyn ala derekter boiynsha, ólim sebebi – mehanikalyq asfiksiia. Oqiǵa aldynda jas jigit anasynyń qońyraýyna jaýap bermegen.
Buǵan deiin Aisulý Aidanqyzy “TalkLike” baǵdarlamasyna bergen suhbatynda kompozitordyń ólimine qatysty birqatar suraqtarǵa alǵash ret ashyq jaýap berip, onyń zaýyt aýmaǵynda kóz jumǵanyn málimdegen bolatyn. Sondai-aq ol ulynyń dosy jalǵyz páterin tartyp almaq bolǵanyn aitqan edi. Keiin Aidanqyzy Almaty sotynyń ulynyń ólimine qatysty sheshimine kelispei, Prezidentten kómek suraǵanyn jariia etti.
