Taraz memlekettik pedagogikalyq institýtynyń janyndaǵy «Baýyrjantaný» ǵylymi-zertteý ortalyǵynyń qyzmetkerleri Ortalyq memlekettik kinofotoqujattar men dybys jazbalary muraǵatynan Baýyrjan Momyshuly týraly jańa beine jáne dybys jazbalaryn tapty, dep habarlaidy QazAqparat.
«1944 jylǵy kinojylnama tabyldy, - dedi JOO-nyń resmi ókili Jandar Asan. - Beinejazbalarda batyrdyń panfilovshylardyń erligi týraly estelikteri men jańa jylmen quttyqtaý sózi bar. Sonymen qatar, maidan dalasynda qaza tapqan qazaq jaýyngeriniń anasyna kóńil aityp barǵan sáti taspalanǵan».
«Biz memlekettik muraǵattyń erekshe esebindegi qorynan Baýkeńniń Jeńistiń 30 jyldyǵyna bailanysty Qazaqstan jazýshylarymen kezdesýindegi sózderiniń jazbalaryn da taptyq. Buǵan deiin jazbalar esh jerde jariialanbaǵan», - deidi ortalyq qyzmetkeri Álimbai Naizabaev.
Sonymen qatar, «Baýyrjantaný» ortalyǵy Halyq qaharmany Baýyrjan Momyshulynyń kóptomdyq shyǵarmalar jinaǵynyń kelesi 15 tomy daiyndalýda. Buǵan deiin onyń 30 tomy jaryq kórgen bolatyn.
2004 jyly ashylǵan ortalyq Halyq qaharmany Baýyrjan Momyshulynyń muralaryn jinaý, zertteý jáne basyp shyǵarý baǵytynda jumys atqarady. Buǵan deiin ult maqtanyshynyń kóptomdyq shyǵarmalar jinaǵynyń 30 tomy, Máskeýden «Legendarnyi batyr» degen atpen estelik kitaby, Almaty qalasynan «Fotoqujattyq albomy» jaryq kórdi. Búginde bahadúr Baýkeńniń kóptomdyq shyǵarmalar jinaǵynyń kelesi 15 tomdyǵy daiyndalýda.
Kóptomdyqta dańqty qolbasshy týraly estelikter, dramalyq shyǵarmalar, arnaýlar, poemalar men balladalar toptastyrylǵan. 31, 32, 33, 34, 35, 36, 37, 38-tomdarda B. Momyshuly týraly belgili qalamgerler, ǵalymdar men qoǵam qairatkerleriniń estelikteri jinaqtalǵan. Olardyń qatarynda Mamytbek Qaldybaev, Dmitrii Snegin, Ázilhan Nurshaiyqov, Tahaýi Ahtanov, Táken Álimqulov, Tursyn Jurtbai, Myrzatai Joldasbekov, Bahytjan Momyshuly, Mekemtas Myrzahmetuly, Muhtar Shahanov, Qasym Qaisenov, Sherhan Murtaza, Ǵabit Músirepov, Zeinep Ahmetova, Ákim Tarazi syndy azamattar bar. Al 39-tomǵa Málik Ǵabdýllinnyń «Baýyrjan Momyshýly» atty orys tilindegi ocherki berilgen. Batyr týraly dramalyq shyǵarmalar 40, 41-tomdarda. Onda Sherhan Murtazanyń «Noqtaǵa basy syimaǵan», Járken Bódeshtiń «Juldyztas» jáne ózge de jazýshylardyń týyndylary bar. 42, 43-tomdarda jalpy sany 200 arnaý óleń toptastyrylǵan. 44-tomda poemalar, 45-tomda jyr, balladalar jinaqtalǵan.
«Jalpy, dúnie júzinde Baýkeń týraly jazylǵan eńbekter óte kóp. Solardyń bárin jinap, aýdarý qajet. Osylardy rettesek, batyr aǵamyzdyń 100 tomdyǵyn shyǵarýǵa múmkindigimiz bar», - dep atap ótti ortalyq qyzmetkerleri.
Taraz memlekettik pedagogikalyq institýtynyń rektory Dariia Qojamjarovanyń qoldaýymen ortalyq búginde Qazaqstan Respýblikasy Ortalyq Memlekettik muraǵatyndaǵy Baýyrjan Momyshulymen qarym-qatynasta bolǵan qoǵam qairatkerleri, aqyn-jazýshylar basqa da óner adamdarynyń jeke qorlaryndaǵy Baýkeńe bailanysty arhivtik qujattardy jinaqtaý ústinde.
