Iliias Óserov Almaty qalasy ákiminiń orynbasary bolyp taǵaiyndaldy, dep habarlaidy "Ult aqparat" qala ákiminiń baspasóz qyzmetine silteme jasap.
Buǵan deiin bul qyzmetti Ásel Júnisova atqaryp kelgen bolatyn. Ásel Júnisova bala kútimine bailanysty, aýtizmi bar balany tárbielep jatqandyqtan, qyzmetinen ketetinin málim etti. Ol endi áleýmettik jobalarmen ainalysýdy qolǵa almaq.
Aita ketsek, Iliias Óserov Almaty qalasynda týǵan. Ál-Farabi atyndaǵy Qazaq Ulttyq ýniversitetiniń, T.Rysqulov atyndaǵy Qazaq ekonomikalyq ýniversitetiniń jáne Turan-Astana ýniversitetiniń túlegi.
2017 jyldyń qyrkúieginen bastap Almaty qalasynyń Strategiia jáne biýdjet basqarmasynyń basshysy qyzmetin atqardy. Buryndary Almaty qalasy Ekonomika jáne biýdjettik josparlaý basqarmasy basshysynyń orynbasary bolǵan.
Eńbek jolyn DBAO «Sberbanktiń» nesie ákimshiligi bóliminde bastaǵan. QR ekonomikalyq damý jáne saýda ministrliginde, QR ekonomika jáne biýdjettik josparlaý ministrliginde túrli laýazymdarda istegen. Qazaqstan Respýblikasy Bas prokýratýrasynyń janyndaǵy materialdyq-tehnikalyq qamtamasyz etý basqarmasynyń basshysy bolǵan.
Jańa qyzmetinde Iliias Óserov strategiia men biýdjet, memlekettik aktivter, týristik qyzmet, halyqaralyq yntymaqtastyq pen tsifrlandyrý máselelerine basshylyq jasaidy.
