Baýyrjan Baibektiń ókili Aijan Táshenova óziniń Facebook-tegi paraqshasynda azamat Janbolat Mamai men onyń jubaiy Inga Imanbaevaǵa qatysty Almaty qalasy Áýezov aýdany №2 aýdandyq sotyna azamattyq tártippen ar-namysty, abyroi men iskerlik bedeldi qorǵaý týraly talap aryz bergenin málimdedi, dep habarlaidy "Ult aqparat".
Onyń aitýynsha, qoldanystaǵy zańnamaǵa sáikes elimizdiń kez kelgen azamaty quqyǵy buzylǵan jaǵdaida ony úsh túrli aiada qorǵai alady: qylmystyq, ákimshilik jáne azamattyq. Baýyrjan Baibek óziniń jeke ustanymyna súienip, jaýapkerlerdi qylmystyq jáne ákimshilik qýdalaýdan bas tartyp, isti azamattyq qaraýmen shektelýdi jón kórgen. Osylaisha, ol jeke tulǵa retinde talap aryzdy ózin negizsiz jáne jariia túrde aýyr qylmyspen aiyptap otyrǵan basqa jeke tulǵalarǵa qatysty beredi.
«Qurmetti dostar!
Búgin men Baýyrjan Qydyrǵaliuly Baibektiń múddesin bildirýshi zańger retinde Janbolat Mamai men onyń jubaiy Inga Imanbaevaǵa qatysty Almaty qalasy Áýezov aýdany №2 aýdandyq sotyna azamattyq tártippen ar-namysty, abyroi men iskerlik bedeldi qorǵaý týraly talap aryz berdim.
Bul talap aryzdy berýge J.Mamai men I.Imanbaevanyń biylǵy 13 sáýirde «Demokratiialy Qazaqstan/Demokraticheskii Kazahstan» youtube-arnasynda jáne áleýmettik jelilerde ornalastyrǵan birqatar beinematerialdary negiz bolyp otyr. Jariialanǵan materialdarda jaýapkerler «jýrnalistik zertteýdi» sebep etip, B.Baibekti sybailas jemqorlyqpen jáne qyzmet babyn asyra paidalandy dep jariia túrde, úzildi-kesildi jáne dálelsiz aiyptaidy.
Atalǵan materialdarǵa jasalǵan taldaý beinerolikterde jalǵyz aqparat kózi – anonimdik «Uzyn Qulaq» telegram-arnasynyń aqparatyn ǵana negizge alǵan. Bul arna – ósek-aiańdy, dolbardy, tekserilmegen jáne shyndyqqa janaspaityn aqparatty taratýmen ainalysatyny málim.
Talapker (B. Baibek) atyna qarata aitylǵan aiyptaýlardyń budan bólek shynaiy dáleldemelik bazasy men rastalǵan deregi J.Mamai men I.Imanbaevanyń beinematerialdarynda da, tirkelmegen QDP saitynda da usynylmaǵan.
Biyl 19 sáýirde, bir aptaǵa jetpeitin ýaqytta Baýyrjan Baibek qajetti resmi qujattar men basqa da materialdardy kórsete otyryp, barlyq aiyptaýlardy jariia túrde joqqa shyǵardy.
Bul rette, J.Mamai men I.Imanbaevanyń aitqan sózderiniń jalǵandyǵyn, jalańsózdiligin jáne arsyzdyǵyn eskere otyryp, B.Baibek óziniń ar-namysyn, abyroiy men bedelin sot arqyly qorǵaý quqyǵyn paidalaný jóninde sheshim qabyldady.
Sondyqtan azamattyq zańnama aiasynda biz beinematerialdar avtorlary aiyptaýlarynyń negizsizdigi men maǵynasyzdyǵyn dáleldeýge niettenip otyrmyz.
Talapkerdiń el aldynda júrgen tulǵa ekendigin, soǵan orai bul jaǵdai men aldaǵy protsestiń úlken rezonans týdyratynyn eskerip, sondai-aq J.Mamaidyń ár túrli tásildi qoldaný arqyly qoǵamdyq pikirdi burmalaý yqtimaldyǵyn boldyrmaý úshin, men jurtshylyqty sot protsesiniń barysymen jedel jáne obektivti túrde habardar etip otyratyn bolamyn. Muny eshqandai saiasatqa aralastyrmai, iske qatysy joq baǵalaýlarsyz tek quqyqtyq aiada atqaramyn», - dep jazdy zańger Facebook paraqshasyna.
Baýyrjan Baibek aqiqatqa kóz jetkizý, J.Mamai men I.Imanbaeva taratqan málimetterdiń jalǵandyǵyn dáleldeý jáne óziniń bedelin qalpyna keltirý maqsatyn ǵana basshylyqqa ala otyryp, keltirilgen moraldyq zalalǵa materialdyq ótemaqy óndirip alýdan da bas tartty.
