Jahandyq ózgeristerge elimizdiń ár azamaty beiimdele bilýi kerek. Bul týraly «Biz - el patriotymyz» halyqaralyq jastar forýmynda «Nur Otan» partiiasy Tóraǵasynyń birinshi orynbasary Baýyrjan Baibek aitty, dep habarlaidy QazAqparat.
«Qazirgi kezde qarqyn alǵan jahandyq ózgeristerge elimizdiń ár azamaty beiimdele bilýi kerek. Bul rette, jastarǵa artylatyn senim men jaýapkershiliktiń júgi zor. Elbasy aitqandai, bizdiń basty úsh qaǵidatymyz – jaýapkershilik, komandalyq rýh jáne ózimizdiń qundylyqtarymyzǵa berik bolýymyz kerek. Partiia múshelerine arnalyp aitylǵan bul sózderdi men kez kelgen jastar úshin de temirqazyq bola alady dep esepteimin. Osy oraida jetistikke jetkisi keletin ár jas osylardy ustanýy kerek», - dedi partiia Tóraǵasynyń birinshi orynbasary.
Sonymen qatar ol qazirgi zamanaýi jastar saiasaty boiynsha mamandardyń basym kópshiligi búgingi kúnniń jas azamatyna tán bolýy tiis úsh erekshelikti bólip kórsetkenine toqtaldy.
Birinshisi - bilimge qushtar bolý. Jańa kásip úirenip, daǵdylaryńyzdy shyńdaýǵa degen umtylys sizderdiń kúndelikti ómir salttaryńyzǵa ainalýy kerek. Zamanaýi jas bir emes, birneshe shet tilin meńgerýi mańyzdy. Ýaqyttaryńyzdy tiimdi paidalanyp, jastyq shaqtaryńyzdy ózderińizdi damytýǵa arnańyzdar», - dedi ol.
Baýyrjan Baibek ekinshiden, sportpen shuǵyldanyp, salaýatty ómir saltyn ustanýdyń qanshalyqty mańyzdy ekenin jahandyq pandemiia dáleldep jatqanyn aitty. Durys ómir saltyn ustanyp, jan men tán saýlyǵyna kóńil bóletin adam ǵana ózin qoǵamnyń tolyqqandy múshesi retinde sezine alatyndyǵyna nazar aýdartty.
«Úshinshi - ainala jurtqa janashyr bolý. Patriot bolý – jaqynyńa, baýyryńa, elińe, jerińe qamqor bolýdan bastalady. Eline, jerine jany ashityn, erekshe mahabbatpen qarap, keleshegine alańdaityn urpaq tárbieleý mańyzdy. Sebebi, bilimdi, deni saý, eli men jerine qamqor jas – elimizdiń gúldenip, kez kelgen syn-tegeýrinnen súrinbei ótýiniń kepili»,- dedi partiia Tóraǵasynyń birinshi orynbasary.
