Qazaqstan Úkimeti Almatydaǵy Baým toǵaiyn erekshe qorǵalatyn respýblikalyq mańyzy bar tabiǵi aýmaqtar tiziminen shyǵaryp, Almatynyń memlekettik tabiǵi qoryqtar qoryna engizdi. Úkimettiń bul týraly qaýlysy elektrondyq úkimet portalynda jariialandy.
Tarihi derekter boiynsha, Baým toǵaiyn (sol kezdegi ataýlarynyń biri - Vernyi toǵaiy) 1868 jyly Jetisý oblysynyń áskeri gýbernatory Gerasim Kolpakovskiidiń jarlyǵy boiynsha Úlken jáne Kishi Almaty stanitsalarynyń kazaktary ege bastaǵan. Qala ataýy Vernyi bolyp ózgertilgen tusta ony "Alferov toǵaiy" dep te ataǵan. Keiin toǵaiǵa Vernyida 47 jyl turǵan ǵalym ári orman mamany Edýard Baýmnyń esimi berilgen.
Baqqa Máskeý, Penza, Ialta, Tashkent qalalarynan alýan túrli jemis aǵashtary men jalpaq jáne qylqan japyraqty aǵashtarynyń kóshetteri ákelinip otyrǵyzyldy. Alǵashqy kezde toǵaida almanyń 74, almurttyń 49, qylqan japyraqty aǵashtyń 17, jalpaq japyraqty aǵashtyń 44, ár túrli butalardyń 52 túri boldy. 1894 jyly Baým «Baým toǵaiyn» kógaldandyrý jóninde baǵdarlama jasap, ony qalalyq Dýmaǵa usyndy. Bul baǵdarlama 1899 jyly tolyǵymen júzege asyp, toǵai Almaty qalasynyń jasyl jelekti aimaǵyna ainaldy. Búginde Baým toǵaiynda 250 myńdai ár túrli aǵash ósip tur.
Biyl ákimdik atalǵan baqtyń biraz aimaǵyn avtosalon ieleri kólik turaǵyn jasaý úshin zańsyz iemdenip kelgenin aitty. Bul zańbuzýshylyqty megapolis ákimdigi tabiǵi aýmaqty kommýnaldyq menshikke alǵan soń ǵana anyqtady.
2006 jyly Baým toǵaiyn Ile Alataýy ulttyq tabiǵi parkiniń kommýnaldyq menshigine ótkizip, erekshe qorǵalatyn tabiǵi aýmaqta ornalasqan respýblikalyq mańyzy bar memlekettik tabiǵi eskertkish degen quqyqtyq mártebe bergen.
