Ánshi Qairat Nurtas Aqtaýda bolǵan oqiǵadan keiin jelide jazba jariialady, dep habarlaidy Sputnik.
Mańǵystaý oblysynda narazylyq bildirýshiler Qairat Nurtas otyrǵan avtokóliktiń jolyn jaýyp tastaǵany týraly aqparat taraǵan edi. Ánshi áýejaiǵa qarai bara jatqan. Jelide oqiǵanyń videosy jariialandy.
Video avtory Qairat Nurtastyń syrtqa shyǵýyn talap etip, "kim bolsań da, halyqtyń muńyn jetkiz" dep pármen beredi. Jelidegi videoda ánshiniń kólik ishinde otyrǵany anyq kórinedi, alaida Qairat Nurtas kólikten shyqpaidy. Kólik artqa qarai júrip, ol jerden ketip qalady.
Sondai-aq video avtory "kirýge de, shyǵýǵa da jol joq" dep málimdeidi. Al onyń aldynda áleýmettik jelide oblys turǵyndary Aqtaý halyqaralyq áýejaiyna aparatyn jol jabyq ekenin habarlady.
Aita keteri, ánshi Qairat Nurtas 3 qańtarda Rixos Aktau-da ótken kontsertten video jariialady. Al áleýmettik jeli qoldanýshylary ánshiniń únemi osyndai qyzý talqylanatyn oqiǵa ortasynda júretinin jarysa jazyp jatyr.
Sodan keiin Qairat Nurtas Mańǵystaý oblysynda gaz baǵasynyń qymbattaýyna bailanysty narazylyqqa shyqqan turǵyndarǵa qatysty oiyn bildirdi.
"Qazaq halqy óte sabyrly, tózimdi, sebepsiz kóteriletin halyq emes. Dál qazirgi jaǵdaida men Batystaǵy aǵaiyndy qoldaimyn. Sebebi halyqtyń arasynda júrgendikten, Qairat Nurtas bolyp qalyptasýymnyń sebepkeri halyqtyń muń-muqtajyn jetkizýge haqym bar. Halyqtyń turmystyq jaǵdaiy tómendep ketti. Esh ózgerissiz turǵan ailyqqa qaramastan azyq-túlikten bastap barlyǵy qymbat. Halyq bar bolǵany ýaiym-qaiǵysyz ómirdi qalaidy. Úkimet basshylarynan "Halyq – Allanyń amanaty" ekenin umytpaýyn suraimyn!", - dep jazdy Qairat Nurtas instagram-paraqshasynda.
Sondai-aq ol Prezident Qasym-Jomart Toqaev tez arada oń sheshimin shyǵaratynyna senim bildirdi.
Mańǵystaýdaǵy narazylyq
Ekinshi qańtarda Suiytylǵan gaz baǵasynyń kúrt kóterilýine narazy Jańaózen men Aqtaý turǵyndary narazylyqqa shyqty.
Oǵan avtokólikke janarmai quiý úshin gazdyń quny eki esege – litrine 120 teńgege deiin óskeni sebep bolǵan. Turǵyndar baǵany 50 teńgege deiin tómendetýdi talap etti.
Qazaqstannyń energetika ministrligi gaz baǵasyn endi suranys pen usynysqa sáikes naryqtyń ózi qalyptastyratynyn túsindirdi. Ákimdik gaz baǵasyn retteýge aralaspaidy. Jeke kásipkerler tarapynan baǵany negizsiz kóterý faktileri týyndaǵan jaǵdaida, básekelestikti qorǵaý agenttiginiń departamenti ákimshilik sharalar qabyldaidy.
3 qańtarǵa qaraǵan túni Prezident Qasym-Jomart Toqaev Twitter-de Úkimetke Jańaózendegi jaǵdaidy shuǵyl túrde qarastyrýdy tapsyrǵanyn jazdy. 4 qańtarda quramynda Prezident Ákimshiliginiń qyzmetkerleri bar Úkimettik komissiia Aqtaýda jumysqa kiriskenin habarlady.
"Respýblikalyq operativtik shtab turaqty negizde jumys istep jatyr. Komissiiaǵa elimizdegi turaqtylyqty saqtai otyryp, týyndaǵan másele boiynsha ózara tiimdi sheshim shyǵarý júkteldi", dedi Prezident.
