Batysqazaqstandyq sportshylar shákirtaqy keshikkenine shaǵymdandy. Olarǵa ai saiyn tólem jergilikti biýdjet esebinen tólenedi, - dep habarlaidy Tengrinews.kz.
Short-trekten Qazaqstan ulttyq quramasynyń múshesi Ádil Qyrymgereev osy másele, tólemderdiń birinshi ret keshigip turmaǵany týraly áleýmettik jelidegi paraqshasynda málimdedi.
"Batys Qazaqstan oblysynda sportshylarǵa shákirtaqy tórt aiǵa keshiktirildi. Biz respýblikalyq jarystarda oblys namysyn, al halyqaralyq jarystarda el namysyn qorǵaimyz. Qarjylyq jaǵynan memleketten qoldaý kútemiz, bul sporttyq mansabymyzda óte mańyzdy. Erteń nátije bolý úshin qazir qarajat bóliný kerek. Al bizde kerisinshe jasalady", - dedi Ádil Qyrymgereev.
Sport sheneýnikteri bul máseleni 10 qarashaǵa deiin sheshýge ýáde berdi.
Batys Qazaqstan oblysynyń dene shynyqtyrý jáne sport basqarmasy qurama komandalardyń múshelerine stipendiia 2017 jyldan bastap tólenetinin atap ótti. Buǵan biýdjetten qarajat bólinedi.
"Biyl sporttyń ár túrinen 240 sportshy birinshi jartyjyldyqqa tólem aldy. Úshinshi toqsanda stipendiialar áli tólengen joq. Biyl bul maqsatqa 106 million teńge bólindi, biraq jetkiliksiz boldy. Bul jyldan-jylǵa sportshylardyń sany artyp kele jatqandyǵyna bailanysty. Toqsandyq shákirtaqy qory 60 million teńge boldy. Tólemderdi biyl 10 qarashaǵa deiin tóleimiz", - dedi BQO dene shynyqtyrý jáne sport basqarmasy basshysynyń orynbasary Jeńis Nyǵmetýllin.
