Batysqazaqstandyq shorttrekshi Ádil Ǵaliahmetov Beijiń olimpiadasynda baq synaidy, dep habarlaidy QazAqparat.
BQO dene shynyqtyrý jáne sport basqarmasy málim etkenindei, halyqaralyq dárejedegi sport sheberi Ádil Ǵaliahmetov 1998 jyly Oral qalasynda dúniege kelgen.
Qaladaǵy №2 orta mektepte bilim alyp, keiin sporttaǵy daryndy balalarǵa arnalǵan mamandandyrylǵan mektep-internatta oqýyn jalǵastyrdy.
Elordadaǵy daryndy balalarǵa arnalǵan respýblikalyq mektep-internat-kolledjinde bilim alyp, Batys Qazaqstan innovatsiialyq-tehnologiialyq ýniversitetin dene tárbiesi jáne sport mamandyǵy boiynsha bitirdi.
Qazaqstan spartakiadasynyń jeńimpazy, elimizdiń áldeneshe dúrkin chempiony, álem kýbogy kezeńiniń kúmis júldegeri atanyp úlgergen Á.Ǵaliahmetovtiń Beijińde baryn salatyny anyq.
Belgili maman, Qazaqstannyń eńbek sińirgen jattyqtyrýshysy Mádiǵali Qarsybekov baptaityn QR short-trek quramasynyń múshesi, qazaq jastary arasynda alǵash ret álem kýbogy kezeńiniń jeńimpazy atanǵan Abzal Ájiǵaliev – qazirgi kezde elorda atynan shyǵyp júrgenimen, ol da – Batys Qazaqstan oblysynyń túlegi.
A.Ájiǵalievtiń habarlaýynsha, Beijiń olimpiadasyna ózi men Ádilden basqa Qazaqstannan Denis Nikisha, Olga Tihonova jáne Iana Han joldama aldy.
