Batys Qazaqstan oblysynda jeltoqsan aiynda 705 adam koronavirýs juqtyrdy. Bul týraly oblys ákimi Ǵali Esqalievtiń tóraǵalyq etýimen ótken jedel shtab otyrysynda aityldy, dep habarlaidy QazAqparat tilshisi.
BQO sanitarlyq-epidemiologiialyq baqylaý departamentiniń basshysy Muhamǵali Aryspaevtyń málim etkenindei, osy aida Qaratóbeden basqa aýdandar men Oral qalasynda indet tirkelip otyr.
Sonyń ishinde 61,4 paiyzy (433-i) Oral qalasynyń úlesine tiedi. Sondai-aq Bórli aýdanynda 102 (14,5 paiyz), Báiterekte 84 adamnyń (11,9 paiyz) aýyrǵany anyqtalǵan.
Batys Qazaqstan oblysynyń Reseidiń bes óńirimen shektesetini belgili. Reseimen shekarada 7 avtoótkel ornalasqan.
Qazirgi tańda «Syrym» (Samara oblysymen shektesedi), «Tasqala» (Saratov), «Aqsai» (Orynbor) jáne «Jánibek» (Volgograd) avtoótkelderinde sanitarlyq-karantindik baqylaý jumystary táýlik boiy júrgizilýde. «Orda», «Qaztalov», «Shaǵan» avtoótkelderi ýaqytsha jabylǵan.
1-20 jeltoqsan aralyǵynda memlekettik shekaradan 18542 adam ótse, sonyń 3242-si – jolaýshylar. Anyqtamasy joq 571 jolaýshy karantindik statsionarǵa jatqyzylyp, tórteýinen kovid tabyldy.
Júk tasymalymen ainalysatyn 9313 júrgizýshiniń 6285-inde anyqtamasy bolǵan. Anyqtamasy joq 3028 júrgizýshiniń jeteýinen indet anyqtaldy. 373 adam shekaradan kirgizilgen joq.
M.Aryspaevtyń sózine qaraǵanda, Resei eliniń 85 óńirinde aýyrǵandardyń táýliktik ósimi 28209-dan asqan. Sonyń ishinde Samara oblysynda táýligine 305 (barlyǵy 27723), Orynborda 178 (26605), Saratovta 263 (31565), Volgogradta 276 (32131), Astrahanda 182 (16591) adamnyń koronavirýs juqtyrǵany tirkelgen.
Sonymen qatar kórshiles Atyraý oblysynyń «qyzyl aimaqqa» kirgeni málim. Osyǵan bailanysty jedel shtab otyrysynda óńirde sanitarlyq talaptardyń oryndalýyna baqylaýdy kúsheitý kerektigi atap ótilip, tiisti tapsyrmalar berildi.
