Batys Qazaqstan oblysynda 10 qańtar kúni ótetin Májilis jáne máslihat depýtattaryn sailaýǵa 5 myńdai baiqaýshy qatyspaq, dep habarlaidy "Ult aqparat".
Oblystyq sailaý komissiiasynyń tóraǵasy Ǵaisa Qapaqovtyń málim etkenindei, sonyń ishinde eki halyqaralyq baiqaýshy EQYU atynan Chehiia men Shvetsiiadan kelmek.
Sondai-aq Saratov oblysynan 6, Samaradan 4, Reseidiń Oral qalasyndaǵy bas konsýldiginen 2 baiqaýshy qatyspaq. Oǵan qosa saiasi partiialar óz baiqaýshylaryn jiberetin bolady. Oblys boiynsha 170-ten astam uiymnyń sailaýda baiqaýshy bolýǵa quqyǵy bar. Sanitarlyq talapqa sáikes komissiia músheleri men baiqaýshylar PTR test qorytyndysy týraly anyqtamalaryn alyp kelýi kerek.
Ǵ.Qapaqovtyń sózine qaraǵanda, partiialyq tizim boiynsha «Nur Otan» 350, «Aýyl» 40, «Aqjol» 35, «Adal» partiiasy 29 kandidat usyndy. Qazaqstan halyq partiiasy úmitkerlerin Májilis sailaýyna ǵana qospaqshy.
Barlyq 454 kandidattyń 217-si nemese 47,4 paiyzy – jastar men áielder.
Oblystyq máslihatqa – 31, qalalyqqa – 22, aýdandyq máslihattarǵa – 147, barlyǵy 200 depýtat sailanbaqshy.
Sailaýdy ótkizý úshin Batys Qazaqstan oblysyna 460 mln astam teńge bólindi. Onyń 89 paiyzy eńbekaqy esebinde tólenedi. Óńirde sailaý komissiialarynyń 3259 múshesi bar.
«Koronavirýs indetine bailanysty barlyq saqtyq sharalary qolǵa alyndy. Komissiia músheleri jeke qorǵanysh quraldarymen, betperde, qolǵap, kózildirikpen qamtamasyz etildi. Olardyń qyzýy turaqty túrde ólshenedi. Sailaýshylar arasynda da áleýmettik araqashyqtyq saqtalady. Sailaý ýchaskelerinde sanitaizerler ornatylyp, antiseptikter qoiylady. Aýa kelip turýy úshin daýys berý kabinalarynyń aldyńǵy jaǵy ashyq bolady. Eger sailaýshy betperde taǵýdy umytyp ketse, onymen de qamtylady», dedi Ǵ.Qapaqov.
