Batys Qazaqstan oblysynda kúshti jel ǵimarattardyń shatyrlaryn julyp áketti, dep habarlaidy QazAqparat.
BQO TJ departamentiniń baspasóz qyzmetinen túsken málimetke qaraǵanda, oqiǵa búgin Oral qalasy men oblystyń birqatar aýdandarynda oryn aldy.
Atap aitqanda, Qaztalov aýdany Jańajol aýylynda saǵat 16.15-te kúshti jel saldarynan orta mekteptiń shatyry (120 sharshy metr) sypyrylyp tústi. Aýdan ortalyǵy Qaztalov aýylynda «Qazposhta» AQ bólimshesi ǵimaratynyń jylý ustaityn jabyny da (25 sharshy metr) shydamady.
Saǵat 16.30-da Jánibek aýdany Jánibek aýylynda M.Yqsanov atyndaǵy kolledj sport zalynyń shatyry (24 sharshy metr) qulady.
Tasqala aýdany Tasqala aýylynda saǵat 15.40-ta jel halyqty jumyspen qamtý ortalyǵynyń shatyryn (225 sharshy metr) julyp áketti.
Oral qalasynda saǵat 17.20-da M.Ótemisov atyndaǵy Batys Qazaqstan memlekettik ýniversiteti ǵimaratynyń 40 sharshy metr jylý ustaityn qaptamasy (aliýkobond) qulady. Sonymen qatar Zachagan kenti Qambar batyr kóshesi 6 jáne Oraldaǵy Iu.Gagarin kóshesi ¼ mekenjailaryndaǵy úilerdiń proflisteriniń qulaý qaýpi týyndaǵany jóninde málimet tústi.
Oǵan qosa turǵyndar qala kóshelerinde aǵashtardyń qulap, avtokólikterdi basyp qalǵany jóninde habarlaýda.
Oblystyq densaýlyq saqtaý basqarmasy baspasóz qyzmetiniń habarlaýynsha, qalada Ábilqaiyr han dańǵylynda avtokólikke úlken butaq qulaǵan. Sonyń saldarynan kózinen jaraqat alǵan 1988 jylǵy er adam, sondai-aq 2003 jylǵy qyz qalalyq kópbeiindi aýrýhanaǵa jetkizildi. Jelaev kentinde shiferdiń kesegi 2011 jylǵy qyzdyń basyna qulaǵan. Qyz qalalyq aýrýhanaǵa jetkizildi. N.Nazarbaev dańǵylynda butaq 1950 jáne 1945 jylǵy áieldiń basyna túsken. Onyń birinshisi aýrýhanaǵa jatýdan bas tartty. Ekinshisi qalalyq aýrýhanaǵa jetkizildi.
Qazirgi ýaqytta aqparattar naqtylaný ústinde.
