Rýhani jańǵyrý baǵdarlamasy aiasynda Batys Qazaqstan oblysynyń mádeniet salasynda 2018 jyly biraz is-shara josparlanǵan. Sonyń biri – Qazaqstannyń jalpyulttyq kieli nysany qataryna kirgen Ǵumar Qarash ziraty ornyna kesene ornatylmaq. Bul jóninde óńirdegi mádeniet, arhivter jáne qujattama basqarmasynyń basshysy Qadyrbolat Musaǵaliev habarlady.
Sala basshysynyń aitýynsha, ótken jyl ishinde óńirde «Týǵan jer – týǵan el» baǵdarlamasy boiynsha - 66 shara, «Qasietti Qazaqstan» jobasy boiynsha – 25 shara uiymdastyrylǵan. Al «Týǵan jer – týǵan el» baǵyty boiynsha 2017 jyly jalpy kólemi 57675,0 myń teńgeni quraityn 21 shara ótkizilgen. Munyń ishinde 16 jeltoqsan kúni Oral qalasynda ashylǵan «Rýhani jańǵyrý» mýzeiin atap aitýǵa bolady. Bul jobanyń quny - 40 mln. teńgeni quraǵan. Al Syrym aýdanyndaǵy Alash mýzeii 22 mln.914 myń teńgege kúrdeli jóndeýden ótip, ekspozitsiiasy jańartyldy.
Qadyrbolat Musaǵaliev bolashaqta aýyl kitaphanalary mádeni, aǵartý jáne oiyn-saýyq ortalyqtaryna ainalatynyn, bul baǵyttaǵy jańǵyrtý jumysy aýdan ákimdikterimen birlese júrip jatqanyn aitty.
Sondai-aq «Ishki týrizm» baǵyty boiynsha oblysta virtýaldy týrlar jáne oblys ishindegi baǵyttar boiynsha joryqtar uiymdastyrylmaq, bul maqsatqa - 12 mln. teńge qarastyrylǵan.
Aita keteiik, Batys Qazaqstan oblysynda Qazaqstannyń makrosakraldy obektiler tizimine 6 nysan, atap aitsaq – ortaǵasyrlyq Jaiyq qalashyǵy, Taqsai obalar kesheni, Bókeiordasy tarihi mýzei kesheni, Alash mýzeii, Jumaǵazy hazret kesenesi jáne Ǵumar Qarash ziraty kirgen bolatyn. 1921 jyly 21 sáýirde 45 jasynda qaskóiler qolynan qaza tapqan aǵartýshy aqynǵa arnalǵan shaǵyn qorshaý men belgi qazirgi Jánibek aýdany Borsy aýylynan 10 shaqyrym jerdegi Qarash kóli mekeninde ornalasqan.
Qazbek QUTTYMURATULY,
«Egemen Qazaqstan»
