Batys Qazaqstan oblysynda «Ohotzooprom» inspektorlaryna oq atty, dep habarlaidy QazAqparat tilshisi.
QR Ekologiia, geologiia jáne tabiǵi resýrstar ministrliginiń Instagramdaǵy paraqshasynda málim etilgenindei, oqiǵa 16 aqpan kúni Kaztalov aýdany aýmaǵynda boldy.
«Ohotzooprom» ÓB» RMQK Batys Qazaqstan óńirlik filialynyń inspektorlaryna eki brakoner qarsylyq kórsetip, oq atqan. Abyroi bolǵanda, adam shyǵyny men jaraqat alǵandar joq.
Inspektorlar reidtik is-sharalar kezinde Juldyz aýyly mańynda «Boran» markaly qarda júretin kóliktiń izine túsken. Jedel qýyp jetken qoryqshylardyń pármenine qulaq aspaǵan qaskóiler «Toiota» qyzmettik kóligine anyqtalmaǵan myltyqtan shamamen 10 ret oq atqan. Avtomobildiń aldyńǵy dóńgelekteri jarylyp, bamperi zaqymdalǵan.
Inspektorlardyń tabeldik qarýdan eskertý oq atqandaryna qaramastan, brakonerler kórshiles Jańaqala aýdany Jańaqazan aýylyna qarai izderin sýytqan.
Oqiǵa ornyna Kaztalov aýdany politsiia bóliminiń qyzmetkerleri shaqyrylyp, osy derek boiynsha qylmystyq is qozǵaldy.
BQO politsiia departamentiniń resmi ókili Bolatbek Nurǵojin oqiǵanyń 16 aqpan kúni shamamen saǵat 17.40-ta oryn alǵandyǵyn jetkizdi.
«Qazirgi kezde QR QK 380-2-babyna (quqyq qorǵaý organy, arnaýly memlekettik organ qyzmetkeriniń, áskeri qyzmetshiniń ómirine qolsuǵýshylyq) sáikes sotqa deiingi tergeý amaldary júrgizilýde. Kaztalov aýdany politsiia bóliminiń qyzmetkerleri osy qylmysty ashýǵa baǵyttalǵan is-sharalardy atqarýda», dedi Nurǵojin.
