Batys Qazaqstan oblysynda 1115 tósektik 11 infektsiialyq statsionarda 674 adam em qabyldaýda, dep habarlaidy "Ult aqparat".
BQO densaýlyq saqtaý basqarmasy basshysynyń mindetin atqarýshy Arman Qalibekovtiń óńirlik kommýnikatsiialar qyzmeti alańynda ótken brifingide málim etkenindei, sonyń ishinde 29 naýqas jansaqtaý bólimshesinde jatyr.
Arman Talǵatulynyń sózine qaraǵanda, jansaqtaý bóliminde jatqandardyń ishinde ekeýi 50-ge tolmasa, tórteýi – 50-60, 17-si – 60-80 jas aralyǵyndaǵylar, beseýi – seksennen asqandar. 23 naýqastyń 16-sy júrek-qan tamyrlary aýrýlaryna, jeteýi qant diabetine shaldyqqan.
Osy kezge deiin oblysta barlyǵy 18104 adam indet juqtyrsa, sonyń 14327-si nemese 79 paiyzy jazylyp shyqty. 269 adam kóz jumdy.
Biyl jyl basynan beri koronavirýstan qaitqandar sany 100-ge jetti. Sonyń ishinde 28-i qańtarda, 15-i aqpanda, 30-y naýryzda, 27-si sáýirde ómirden ótti. Olardyń 56-sy áielder
bolsa, 44-i – er adamdar.
Qaitqandardyń 98-iniń sozylmaly derti (75 paiyzy – júrek-qan tamyrlary aýrýlary, 13 paiyzy – qant diabeti, basqasy – 12 paiyz) bolǵan.
«Qazirgi tańda indet órship tur. Naýqastar infektsiialyq statsionarǵa aýyr jáne asa aýyr halde túsip jatyr.
Sondyqtan COVID-19-dyń taralýyna jol bermeý úshin turǵyndar shekteý sharalary men sanitarlyq talaptardy qatań saqtaǵany jón», dedi Qalibekov.
