Batys Qazaqstan oblysynda eki sý qoimasy salynady. Bul jaiynda QR Premer-Ministriniń orynbasary Roman Skliardiń Májilis depýtattary saýalyna bergen jaýabynda aitylǵan, dep habarlaidy QazAqparat.
«Sý qoimalary máselesi jóninde Batys Qazaqstan oblysynda eki sý qoimasyn salý jáne bireýin jańartý kózdelgen. Sonymen, Reseiden Edil sýyn berý jónindegi qyzmetterge respýblikalyq biýdjettiń shyǵyndaryn 30 paiyzǵa deiin tómendetý jáne 12 myńnan astam turǵyndardy sýmen qamtamasyz etý úshin Kaztalov aýdanynyń Jalpaqtal aýylynan joǵary Qaraózen ózeninde kólemi 28 mln tekshe metrge deiin bolatyn sý qoimasyn salý jobasynyń tehnikalyq-ekonomikalyq negizdemesi daiyndaldy. Memlekettik saraptamanyń oń qorytyndysy alyndy jáne ony iske asyrý 2022-2024 jyldarǵa josparlanyp otyr» delingen Roman Skliardyń jaýabynda.
Sonymen qatar, vitse-premer jobalyq syiymdylyǵy 10-12 mln tekshe metrdi quraityn Kaztalov aýdanynyń Seksenbai aýyly tusynan sý qoimasy qurylysyna qazirgi ýaqytta tehnikalyq-ekonomikalyq negizdeme daiyndalyp jatqanyn jetkizdi.
«Budan basqa, Kirov sý qoimasyn rekonstrýktsiialaý úshin jobalaý-smetalyq qujattama daiyndaldy. Onyń quny - 2,6 mlrd teńge. Jobany iske asyrý 2022-2024 jyldarǵa josparlanyp otyr. Jaiyq ózeninen sý tutyný mólsherin azaitý maqsatynda sýlandyrý júiesin rekonstrýktsiialaý, qaitalama sý paidalaný, egin sharýashylyǵynda tamshylatyp, jańbyrlatyp sýarý ádisterin qoldaný jáne basqa da tetikter qarastyrylǵan», - dedi ol.
