Basy birikpegen jeke qosalqy sharýashylyqtar shyn máninde ólmestiń kúnin kórip otyr. Bul týraly búgin Qazaqstan halqyna Joldaýyn jariia etken QR Prezidenti Qasym-Jomart Toqaev aitty, dep habarlaidy QazAqparat.
«Biz gorizontaldy kooperatsiianyń da áleýetin esten shyǵarmaýyz qajet. Onsyz agroónerkásip kesheninde qarqyndy damý bolmaidy. Basy birikpegen jeke qosalqy sharýashylyqtar shyn máninde ólmestiń kúnin kórip otyr. Bul rette sapaly ári mol ónim óndirý, úzdiksiz taýar jetkizý týraly sóz qozǵaýdyń ózi orynsyz», - dedi Memleket basshysy.
QR Prezidentiniń atap ótýinshe, básekege qabiletsizdik pen importtan aryla almai otyrýymyzdyń sebebi de osynda jatyr.
«Kooperatsiia kezinde jer jáne basqa da múlikke qatysty barlyq quqyqtar saqtalady. Kooperatsiia sharýashylyqtarǵa shikizat satyp alý, ónim óndirý jáne ony satý barysynda kúsh jumyldyrýǵa múmkindik beredi, Aýyl eńbekkerleriniń aýyr jumysy tym arzan baǵalanady. Bul jasyryn emes. Tabystyń basym bóligine alypsatarlar kenelip jatady. Sondyqtan sýbsidiia jáne salyq jeńildikterin berý baǵdarlamalary aiasynda aýyldyq jerderdegi kooperatsiiany yntalandyrý úshin tiisti sharalar toptamasyn ázirleý qajet», - dedi Qasym-Jomart Toqaev.
