Qazaqstanda baspasóz hatshylarynyń sanaty departament direktory deńgeiimen teńestirilmek. Bul týraly búgin QR Aqparat jáne qoǵamdyq damý ministri Dáýren Abaev aitty, dep habarlaidy "Ult aqparat".
«Taǵy bir mańyzdy baǵyt - bul memlekettik organdardyń BAQ-pen ózara is-qimyly. Baspasóz qyzmetiniń jumysyna úlken nazar aýdarylyp otyr. Sońǵy ýaqytta memlekettik organdar birinshi basshylarynyń baspasóz qyzmetterine qarym-qatynasy qatty ózgergendigin barlyq jaýapkershilikpen aita alamyn», - dedi ol jergilikti atqarýshy organdar qyzmetiniń ashyqtyǵyn qamtamasyz etý máselelerine arnalǵan respýblikalyq seminar-keńeste.
D.Abaevtyń aitýynsha, endigi ýaqytta ministrler de, ákimder de baspasóz hatshylardyń jumystaryna jaýapkershilikpen qaraityn bolǵan.
«Bul - ýaqyt talaby. Biz óz tarapymyzdan jyl saiyn baspasóz qyzmetteri qyzmetkerleriniń biliktiligin arttyrý kýrstary men seminarlaryn ótkizip, eń belsendi ári saýatty baspasóz hatshylardy Astana Media week aiasynda yntalandyryp otyramyz. Biz alǵash ret baspasóz hatshylarynyń mártebesin BAQ týraly zańda jazdyq. Qazirgi ýaqytta baspasóz hatshysy sanatyn departament direktoryna deiin kóterý boiynsha jumys júrgizilip jatyr», - dedi ol.
